Recientemente corte a duna gobierno autorisacion pa retira un funcionario publico. Despues cu e señora, un aspirante den politica, a cay den overtolligheidspool, a dun’e tres diferente oportunidad. Sinembargo sin motibo hustifica, el a nenga e posicionnan of no a coopera pa cual a dicidi pa cuminsa procedura pa dun’e su retiro.
Gobierno ta haya cu el a demostra di no tin e caracteristicanan di ta un bon sirbido di pueblo, un ambtenaar. A dun’e suficiente chens pa bay ocupa un otro funcion despues cu desde 2001 e tabata hinca den e overtolligheidspool.
Den e veredicto di corte por a lesa cu a haci tres intento pa pone den un otro funcion, pero e no tabata duna di su banda pa e por drenta e proceso laboral sirbiendo su pais, of ora cu el a bay test un funcion, a bay AO pa un periodo largo.
Hasta el a pusha pa haya un conseho negativo ora cu a pone na Departamento di Labor, pa motibo cu e kier sigui cu su actividadnan politico.
Na final, a dicidi di entreg’e su retiro entrante prome di juni, 2022, contra cual decision el a bay corte. Conseho di Apelacion, pa casonan di ambtenaar, a ratifica e prome decision: e retiro ta na su luga. Na 1990 el a drenta den aparato gubernamental. Entrante prome di november, 2001 el a bira no-activo y poni den e famoso overtolligheidspool.
Departamento di Recurso Humano na 2019 a cuminsa un trayecto di intermediacion cu a meta pa reduci e cantidad di ambtenaarnan den e pool menciona. Den e caso specifico aki, a ofrece puesto na Dienst Brandweer, Dienst Gevangeniswezen y Inspectie Volksgezondheid. Despues di combersacionnan di solicitud na e servicionan menciona, e no a seleccion’e pa ocupa un di e puestonan.
Den e carta di Gobernador di Aruba cu a rechasa pa pone na un di e servicionan menciona, a splica cu su aspecto di descuido den combersacionnan di solicitud, su splicacion cu e mester cuida su yiunan mayoria di edad y su insistencia cu e kier sigui haci su actividadnan politico, a wordo splica como e motibonan pa no tum’e. E no a bay contra e decreto gubernamental aki di 29 di october, 2020. Prome cu e carta ya caba a pone entrante 14 di september di prueba den e funcion den administracion na Bureau Arbeidsgeschilen (BAG) di Directie Arbeid en Onderzoek (DAO). Riba su prome dia di trabou, el a meld malo den oranan di merdia.
Prome minister mes, encarga cu e aparato gubernamental, a mand’e un carta dia 10 di november, 2020 den cual a inform’e cu tres biaha a trata di yud’e haya un otro trabou. Y cu despues di diesnuebe aña di ta no-activo, e tin e deber pa coopera pa yega na un otro funcion y cu ta spera e coopera cu e periodo di prueba cu ta bay pone na DAO.
Na mesun momento a inform’e cu ta spera cu e ta coopera ya cu de lo contrario lo bay pidi su retiro. A dicidi pa prolonga su prome periodo di prueba te cu september, 2021, pa motibo cu e tabata e tabata meld malo pa periodo largo. Esaki tabata stroba pa haci un bon evaluacion di dje. Pero na augustus, 2021 e director di DAO a informa minister cu e no ta haya cu e por bay funciona eynan. E ta meld malo hopi, problemanan personal pa cual e no ta contribui realmente na e seccion di BAG. A dicidi pa bolbe prolonga e periodo di prueba te cu februari, 2022. A palabra cu tur luna lo tene un reunion pa mira con e ta avansa.
Cuater luna a tene e combersacionnan mensual cu ne y dia 25 di februari, 2022 e director di DAO a informa e ambtenaar cu su evaluacion final ta negativo. A splica cu despues di tres reunion / combersacion caba a constata cu no tin avance den su funcionamento, produccion y presencia na trabou. Su actitud despues di e ultimo combersacion riba 17 di november, 2021,a causa un kiebro den e relacion di trabou.
Tur esaki a conduci cu a dun’e su retiro entrante prome di juni, 2022. E motibonan duna ta su falta di capacidad y e carta di contesta di Gobernador contra su peticion pa e wordo poni na DAO cu a keda rechasa.
Corte den su analisis a menciona cu e ambtenaar aki tabata ausente pa periodonan largo (malo), e no ta coopera den e combersacionnan pa mira con e ta avansa y e echo cu no a logra pa haya aprobacion pa ocupa un puesto na DAO. Ta 20 aña e ta no-activo y a inform’e adelanta y esakinan no tabata prome biaha cu a haci intento pa ocupa otro funcion. A bis’e tambe cu e lo haya su retiro si e no coopera.
Su hustificacion mes ta cu a uza e echo cu e tabata malo pa no tum’e na DAO, y tambe motibonan personal di un funcionario halto den DAO cu a duna un conseho negativo contra dje.
Conseho di Apelacion ta menciona den nan decision cu a dun’e tres chens na otro departamento pero no a coopera. Despues a habri oportunidad p’e na DAO unda dos biaha e prolonga e periodo di prueba. Tabatin condicion cu tur luna mester tin un reunion pa mira con e ta avansa. El a nenga pa participa te ora cu nan a dun’e e ordo cu e mester acudi na e reunion. Pa colmo den e reunion ey dia 17 di november, 2021 a inform’e cu ta mira un avance, pero el a pidi nan pa duna un conseho negativo pa motibo cu e kier sigui cu su carera politico.
El a sali di e reunion y a duna comentario negativo di esunnan presente den e reunion na su coleganan na DAO. Esaki a pone cu a duna un conseho negativo riba su funcionamento. Mirando e advertencia cu el a haya cu e mester coopera mirando cu e tin casi 20 aña caba den e overtolligheidspool, a spera cu e lo a duna tur di su banda pa por traha na un di e departamentonan unda cu tabatin puesto habri. Pues a brind’e suficiente chens pa sali for di e overtolligheidspool y contribui activamente na servicio publico.
Pero e no a probecha, gobernador tabatin tur derecho pa dun’e su retiro. Pues e apelacion pa kita e retiro no tin base.
Lesa mas den TREMPAN.
