Ta bisto y ta bon cla cu minister di enseñansa, no ta respeta Parlamento y ta sigui haci loke cu e kier y den tempo di vacacion di scol aworaki, Rudy Lampe ta maniobrando for di bista di hopi hende pa asina e impone su plan pa independisa diferente sector di enseñansa.
Lider di fraccion di AVP, Marlon Sneek ta mustra cu minister Lampe ta sigui su caminda, ta sigui haci loke e kier haci y ta sigui cu e proceso pa independisa DPS, apesar cu Parlamento a pasa un mocion cu ta bisa e minister pa e para e proceso aki mesora.
“Nos por a mira con na MDC, esta Multi Disciplinaire Centrum, minister a priminti na parlamento cu a pasa un mocion caminda el a garantisa cu e MDC ta bay sigui funciona manera mester ta, pero nos a haya informacion cu minister Lampe ta sigui saca hende for di MDC, den e caso recien caminda ya no tin terapista loke kiermen cu e ‘observatiecentrum’ no por funciona manera mester ta ya cu no tin un hende pa observa e muchanan, pa traha plannan y pa sigui traha.
Nos ta lamenta cu e minister aki no ta sincero y si esey ta su vision, esey ta su plan, cu e kier elimina e cosnan aki, e minister bisa pueblo cu esey e kier haci.
Pero no di un manera scondi, manera nan ta bisa na Hulandes, bo a laga e centro aki ‘bloed dood’ y esaki ta di lamenta cu e minister ta haciendo e movecionnan aki.
Banda di tur esaki un di e otro mochinan cu e minister ta comiendo, ta esun di Tra’i Merdia, caminda ya caba nos por a nota cu e minister a purba di independisa e Tra’i Merdia y hinke bou di un stichting pero ora cu sindicato a para duro contra dje nos por a mira cu el a hala atras pero awor den mesun periodo di vakantie, minister Lampe a instala un comision nobo cu ta bay traha supuestamente riba plannan nobo, riba visionnan nobo pa Tra’i Merdia, kiermen nos por conta cu Tra’i Merdia a bay cay bou di un stichting pasobra esaki ta meta di e minister.
El a gaña hunga un wega, gaña hunga un rol den parlamento, bisando cu no e no ta bay pasa pero den un entrevista cu e minister a duna, por a scuch’e bon caminda el a papia di hendenan cu a firma cu supuestamente ta maestronan di scol, anto e no a mishi cu ningun maestro di scol, kiermen e ta pensa cu e tin mag di mishi cu tur hende.
Di aworaki mi ta bisa tur hende cu ta cay bou di DPS, entre otro esunnan di MDC, esunnan di Tra’i Merdia, boso cuminsa busca boso firma pa para duro contra di e minister aki pasobra e minister aki ta mustra cu su direccion ta, pa bay independisa tambe e Tra’i Merdia pasobra ya caba Nos Atardi a wordo independisa, a wordo buta bou di un stichting.
Esunnan cu tabata traha cu Nos Atardi tabata cay hunto bou di esunnan cu ta traha pa Tra’i Merdia de mesun edificio pero ya nan a cuminsa schuif y muda y saca nan afo y a cu esey ta bay bira un stichting y Tra’i Merdia ta bay bira un stichting bou di e gobierno aki, bou di minister Rudy Lampe paso esey ta su meta.
El a hunga un wega y e ta gaña haci manera cu nada ta pasando pero nos tin informacionnan cu e gruponan cu el a institui pa atende cu DPS, a sigui cu e procesonan pa independisa ya cu e minister aki manea ya mi a bisa, e minister aki no ta come e pisca completo pero na mochi e ta partiendo esaki y esey nos lo keda vigila su maniobranan y nos ta lamenta cu e minister aki no ta respeta Parlamento.
Mas di tres siman pasa a dirigi un serie di pregunta na su persona riba e tema aki pero e minister aki no ta contesta parlamento caminda el a haya e preguntann aki por escrito y ta su deber di contesta e inkietud cu parlamentarionan tin,” Parlamentario Marlon Sneek a mustra.
