Diamars mainta e Venezolanonan cu ta pega na Aruba, a presenta dilanti AVISA-SA. Nan a haci esey pa pidi bek loke nan a paga p’e pasashi. Durante e transmision, Anais Sanchez a acusa Marllory Medina di Fundacion Venezolano di Aruba di no a sostene nan. Medina a reacciona riba e acusacion aki.
El a bisa cu Fundacion Venezolano di Aruba no ta responsabel p’e vuelo humanitario aki. A pesar di esaki Medina a declara cu el a tuma dato di tur e personanan aki y a traha un carta. El a hiba pa Minister di Husticia y a base di esaki e grupo a haya asistencia di Cruz Cora.
Tambe a hiba e carta pa Consulado Venezolano, pero Medina a declara cu e no a haya ningun sosten pa e Venezolanonan aki. E consul a laga sa cu nan no tin nada di haber cu e situacion aki. E no sa kico mas por haci p’ e grupo aki, ya cu manera el a menciona, e vuelo no ta responsabilidad di e fundacion, sino di Warda Nos Costa y DIMAS. Banda di esey e ta di opinion cu nan mester papia cu e señora di Laser pa haya sa con a para cu e vuelo.
Segun Medina, e fundacion a percura pa trece cuminda pa nan y ultimo a hiba pamper pa e muchanan. E no ta compronde dicon Anais a haci e declaracionnan aki. Pues te diamars e ayudo p’e Venezolanonan aki a yega.
