Diahuebs mainta minister-president Evelyn Wever-Croes a presenta den parlamento pa brinda mas splicacion riba con e negociacionnan cu Hulanda a bay, y tambe comparti mas informacion y documentacion cu parlamento.
Drs. Marisol Lopez-Tromp, lider di fraccion MAS ta subraya cu minister-president practicamente no a contesta casi niun di su preguntanan. “Unico cos cu a recuri cu ne ta pa trece tur sorto di acusacion, purba daña nomber di hende den parlamento manera semper, en bes di contesta e preguntanan.”
Loke cu Lopez-Tromp a trece dilanti ta, cu segun su persona, minister-president tin un onwerkbare-situatie, mirando tambe cu el a hinca Aruba den mas debe pasobra e no a dicidi riba e parti di ley di Reino. El a subraya tambe cu apenas cuater aña pasa, e ley di supervision financiero aproba na parlamento den 2015 cu tabata tin tanto problema, a pasa pero tanto aña despues na 2019 a bin cu cambio riba dje. A bini cu cambio riba esaki riba iniciativa e tempo ey di parlamentarionan Rocco Tjon cu Ady Thijsen, cual no tabata aceptabel pa Hulanda segun Lopez-Tromp.
“Y awor bo ta mira cu eigenlijk Hulanda ta bin cu proposicion di no kier un tipo di ley asina pa garantisa supervision financiero. Solamente nan kier un Rijkswet, y pasobra nan no kier pa Aruba por cambi’e su so, nan kier ta sigur di por haya nan placa bek.”
E parlamentario ta haya cu minister-president ta papia cu dos lenga, pasobra e tempo ey a hasta apoya e cambio di ley, y awor tin un situacion unda no kier acepta e Rijkswet, anto a firma p’e caba. “E ta un situacion hopi contradictorio.”
Lesa mas den TREMPAN.
