“Minister-president ta trece informacion dilanti cu no ta cuadra y den e caso di Minister Glenbert Croes e sentencia cu e minister a haya pa cu DIMAS, no ta un co’i kens.” Esaki lider di fraccion di MAS drs. Marisol Lopez Tromp a trece dilanti den un entrevista cu Noticiero Enfoke.
E tipo di vonnis aki ta similar na esun cu ex-minister Sevinger a haya, den cual a bisa cu esaki ta kita e piannan di nos estado di derecho. E tempo ey tur hende a grita y sali critica e ex-minister pero awor cu tin un vonnis similar of pio pa minister Glenbert Croes pa loke ta e kitamento na DIMAS uzando MBnan ilegal y documentonan cu no ta corecto, awor tur hende ta keto. Hues ta bati Glenbert su dede y bis’e cu el a tuma decisionnan contra e ley di nos constitucion. Tuma bon nota cu Hues ta bisa Glenbert Croes saki cu su nomber y funcion di Minister van Arbeid, Energie en Integratie. Hues ta bisa cu e mandatario a actua contra diferente ley, cu otro palabra, a laga Glenbert na werki y cu tur e argumentonan pakico.
Na mes momento minister-president ta sali bisa: “Ang mi a lesa, mi a wak e, nan a bisa nos cu algun cos no a cana corectamente, pero ya no tin un sentencia ainda cu ta mustra cu e minister a haci algo fout.” Pueblo ta compronde e documentonan aki y ta un insulto pa nos inteligencia pa nos Prome Minister ta papia asina cu nos y kere cu e por tuma nos haci. Lopez-Tromp a sigui bisando: “Loke mi ta wak ta, ora algo no sali na su fabor of e ta keto riba e asunto of e ta troce informacion. Nos ta wak e mesun comportacion aki den caso di investigacionnan cu ta tuma luga den e departamentonan. Wak recientemente e discusion riba caso di Avestruz y caso di Flamingo. Nos ta wak constantemente minister-president ta papia di caso di Avestruz. Den tur reunion cu e bin den parlamento e ta haya ta bon pa menciona diferente aspecto, pero esun cu ta cerca di dje y cu a sosode bou di su encargo como minister-president y cu su persona di confiansa ex-minister Otmar Oduber, cua dia el a papia di dje? Bo por busca un momento ki dia e la papia di dje ultimo dos aña? Cua momento el a bisa algo di e investigacion aki, y kico e ta pensa di dje? Pasobra e no ta papia riba dje. Prome Minister ta scoge deliberadamente cua topico si, cua topico no, y nos tin un minister di integridad di RAIZ cu ta keto. Unda boso bos ta den tipo di sentencia asina? Unda boso bos ta den casonan cu ta bai completamente robes den diferente ministerio, investigacionan den entre otro Arubahuis, investigacionnan haci pa CAD, investigacionnan den DIMAS of otro departamentonan. Ki dia nos a wak RAIZ sali padilanti como partner di coalicion y bisa cu esaki no ta aceptabel den cuadro di integridad? No ta tur minister a pasa un screening? Tur minister a pasa un screening , dus pakico den e caso aki boso ta keto?.”
Marisol Lopez Tromp ta conclui cu locual ta cumbini minister-president e ta bay riba dje, y e casonan serio cu ta wordo investiga, ningun palabra.
