Despues di e warwaru causa pa mando di partido POR, exigiendo retiro di Marisol Lopez Tromp como Minister apunta door di partido POR, e mandatario a haya un invitacion pa un combersacion cu Gobernador.
Diabierna mainta tabatin e reunion di Conseho di Minister ora cu e bom di POR a cay. E reunion di Conseho di Minister a sigui normal sin presencia di Minister Andin Bikker, kende a haci e anuncio di e partido den un conferencia di prensa.
Prome Minister Wever Croes a manda pa prensa un audio cu su mensahe den cual ta bisa cu esaki ta un problema interno mester resolve internamente. Cu país Aruba ta pasando den momento difícil y mester di tranquilidad y stabilidad.
Algo prome cu 2’or di merdia Minister Marisol Lopez Tromp a yega oficina di Gobernador. Segun el a bisa, el a haya invitacion pa un reunion. El a priminti cu na su salida e lo duna un declaración y reacciona riba ponencianan treci den e conferencia di POR. Na mesun momento el a bisa “Mi ta Minister ainda, legalmente nombra.”
