Diaranson atardi Maria College MAVO a organisa nan evento ‘Un buelo’. Un manera ingenioso pa duna resultado di examen na nan studiantenan.
Angeline Rosenstand, director di Maria College MAVO, a bisa cu tabata tin 148 candidato pa examen, di cual 10 ainda no a caba cu nan examen. A resta 138 a termina cu nan examen y di esakinan, 94 a slaag y 45 no a logra slaag e aña aki, cu ta bon pa 68%.
E aña aki ainda no por compara cu e otro añanan, aunke cu nan tabata spera un miho resultado. Ainda falta e di dos tanda (tweede tijdvak) y ta spera cu e cantidad di alumno cu slaag por aumenta un poco mas. Tin diferente motibo pa cual e muchanan no ta slaag den e prome tanda y ta spera di por logra un miho resultado den e di dos tanda.
Rosenstand a sigui bisa cu e ta haya cu un di e retonan den enseñansa ta e manera di duna les. Ta hopi cos a cambia, y un di e cambionan ta e manera di duna un les, si compara e manera con tabata duna les antes. Por bisa cu e manera di haya les pa cu examen, no a cambia, pero si e generacion. Lo mester bay traha riba esey, pa e muchanan ta mas motiva, pa nan logra mas. Esaki ta loke e empresanan eyfo ta pidi tambe.
Un deseo cu e docentenan di Maria College MAVO cu nan ta enfoca riba habilidadnan di siglo 21, e traha den grupo cual nan ta haciendo caba. Esaki ta loke nan kier wak bek den examen. Trahando den grupo, trahando riba proyectonan, cual na ultimo ainda nan tabata trahando riba nan proyecto di arte, unda cu ta saca e miho potencial di e hobennan.
Directora di Maria College MAVO, Angeline Rosenstand a felicita e hobennan cu a slaag pa nan examen y pa esunnan cu no a slaag, semper den bisa ora cu nan no slaag ta momento di bay bek, saca lo miho di nan mes y esey ta haci cu nan por yega leu.
