Brazil Taekwondo Stichting tabatin un aña hopi druk, pero tambe hopi exitoso tras di lomba. P’esey, p’e temporada di fin di aña nan a bini hunto pa asina celebra esaki.
Clifford Rasmijn, Presidente di Brazil Taekwondo Stichting, a cuminsa na gradici henter e pueblo di Aruba, pa e sosten brinda na Brazil Taekwondo plus Taekwondo Team Aruba. Pero tambe prensa cu semper ta coopera cu Brazil Taekwondo door di publica nan relatonan y cu semper ta pendiente di nan.
Brazil Taekwondo Stichting su tradicion di tur aña ta di tene nan Cena di Pasco hunto cu e atletanan, un tradicion cu a cuminsa desde cu Willy Willems y te cu e actual presidencia. Ta sigui crece y cosecha e frutonan di nan trabou y dedicacion.
Mas aleu, Rasmijn a bisa cu Brazil Taekwondo tabatin un tremendo aña, a pesar di cu nan tabatin varios atleta nobo, pero sin lubida e bieunan cu t’ey pa yuda e nobonan. El a bisa di ta hopi orguyoso di su atletanan cu ta sigui saca cara, no solamente di e scol di taekwondo, pero sigur, cara di Aruba.
Tur aña Brazil Taekwondo Stichting ta honra su atletanan cu a destaca durante e aña y esaki ta wordo anuncia na e Cena di Pasco.
Master Clifford Rasmijn a concentra ariba e generacion nobo cu ta e futuro di mañan y a scoge e siguiente atletanan.
-Lianna Danker Atleta mas Disciplina 2023.
-Xenon Nurse Rookie di Aña 2023.
-Quinten Klaber Atleta mas Destaca 2023. -Aidan Klaber Atleta di Aña 2023.
Brazil Taekwondo ta desea tur su atletanan y pueblo en general un Bon Pasco 2023 y un Feliz Aña 2024.
