Durante e bishita na Centro Con Animo na Bogota, unda tin bintitres yiu di tera den rehabilitacion, a probecha pa combersa cu un di e clientenan. E centro aki ta yuda personanan cu tin un adiccion, coy e rumbo di bon caminda bek.
A combersa cu un Rubiano aki, cu ta keda anonimo pero si tabata kier a manda un mensahe pa e hendenan na Aruba. E pashent femenino aki tin 41 aña y tin nuebe luna interna caba den e centro, unda seis dia pa siman nan ta sigui e lesnan pa yuda nan bira “clean”.
E pashent inicialmente tabatin problema cu alcohol, pero na final di 2020 cos a sali for di man ora cu el a cuminsa experencia cu crack. Kico a conducie na e situacion aki? E mal noticia, pa di tres bes, cu e tin cancer di pecho. “N’e momento ey mi a tira mi mes den abismo, pensando cu mi no ta sali mas di e malesa aki. Y hopi otro aspecto rond di mi bida tambe a hunga un rol.”
El a dicidi di aleha di principalmente su yiunan, pa nan no mir’e malo of con e cancer ta caba cu ne. “No ta algo bunita pa tres mucha chikito wak, con e malesa ta pone un persona seca, pa cual mi a laga nan bay cu nan tata.”
E situacion ey, leu di su yiunan, a pone cay. Prome cu esey, e unico droga cu e tabata uza ta esun prescribi pa oncologo of psikiatra.
E adiccion, e ta bisa, por cuminsa na cualkier edad. Y a duna e ehempel cu na tur fiesta na Aruba of happy hour tin alcohol, eynan caba e tentacion ta cuminsa. “E ta cuminsa cu un tiki, ta sigui un tiki mas te ora cu e bira un adiccion cu ta bira for di control. E ta haci bo bida ingobernabel.”
Adiccion, el a splica, ta bini di un problema of trauma cu e persona no por asimila. Na Aruba tin e tendencia cu un persona cu ta bay psycholoog y psikiatria ta hende loco, pero no ta berdad. E mes ta haya cu ta bon pa trata un persona cu adiccion prome cu mand’e pa un di e profesionalnan ey.
E ta haciendo tur su empeño pa bay Aruba mas lihe posibel. “Ta danki na mi famia cu mi ta aki den.” E contacto cu famia ta limita. E ta papia mas tanto cu su mama y su yiunan, ya cu nan tin solamente dos chens pa siman, durante 15 minuut, pa haci contacto cu famia. “Mi mama ta feliz y contento cu mi ta recuperando. E ta tristo pa un mama mira su yiu den un situacion manera cu mi ta aden,” el a conta. Su tres yiunan tin 14, 11 y 9 aña. E tin contacto cu nan pero nan no sa e realidad completo door cu nan ta chikito y tin pensamento infantil.
“Busca ayudo,” el a bisa, “tabata un di e miho decisionnan cu mi por a tuma den mi bida. Esaki di berdad ta un regalo cu yama amor propio.”
Centro Con Animo a dun’e un bida bek. E ta conta cu nan ta trata mayoria tipo di adiccion, y tambe gamblemento cu e Rubiano ta hopi den dje. Tin un staff completo di profesional cu ta atende cu tur e pashentnan. “Ta parce cu mi ta den hotel y nos ta haya e chens di studia aki, di desaroya nos mes. Mi no tin nada di keha. Nos ta haya remedinan na ora.”
E centro “Con Animo” ta situa algun ora leu di Bogota, Colombia. Pa ta exacto na San Antonio del Tequendema, y e ta un centro masha conoci maneha pa un Rubiano Jean-Paul van der Kuyp.
