E atleta paralimpico local Elliott Loonstra hunto cu Maickel Melamed tabata presente awe na The Movies @Gloria. Aki Melamed a tene su charla di “The Most Extreme Challenge of Our Lives- Rappel Angels Falls”. El a comenta cu e ta emociona di por a mira e hendenan comparti y disfruta di e experiencia unico cu el a pasa aden na Salto Angel.
E ta hopi orguyoso di por planta su mensahe entre e publico pero tambe di a ricibi e calor di comunidad Arubiano. Melamed ta contento cu comunidad a compañ’e den e charla aki. Pa Melamed ta importante pa subraya cu miedo ta djis un etapa y no algo cu bo mester identifica bo mes cu ne.
Mirando tur e aplausonan y e preguntanan cu el a ricibi den The Movies @Gloria, Melamed ta sinti cu en berdad e hendenan cu a asisti a keda contento. E mensahe cu su documental ta trece dilanti ta cu “tur cos ta nace despues di miedo” y esaki tin di haber cu enfrenta e miedo, no manera un enemigo, sino mas bien como algo cu ta djis parti di nos caminda. Algo cu ta parti di e caminda pa forma nos mes.
Sin duda, Maickel Melamed ta sinti cu esaki ta un perspectiva di bida cu por duna un impulso na biba cu miedo for di un otro perspectiva pero tambe pa biba bo capacidadnan for di un otro perpectiva. Tambe mester compronde cu e paisahenan asina mahestuoso caminda bo ta sinti asina chikito manera El Salto Angel, aki tambe bo ta conecta cu e grandesa propio. E no ta bay si ta facil of no, segun Maickel Melamed, e ta nacesario, strategico y fundamental.
Na final Melamed a gradici tur persona cu a presencia e charla pero alabes a gradici na The Movies @ Gloria cu a organisa e charla. Maickel ta feliz di ta na Aruba y ta desea pa un y tur por contagia otro cu e felicidad aki. Su siguiente aventura ta pa yega su cas pa por continua cu su bida….esey ta e miho aventura cu nos por tin.
TOCANTE MAICKEL MELAMED
Maickel Melamed a nace dia 27 di april di aña 1975 na Caracas, Venezuela. E ta e di dos yiu di Maritza Trujillo y Alberto Melamed. Maickel ta un coredor riba distancia largo. Alabes e ta un motivador, consehero financiero, docente di filosofia y docente di fisioterapia. Maickel ta co-fundado di De Alto Rendimiento DAR.
A pesar cu na momento cu el a nace e dokternan no a dun’e mucho tempo di bida, cu masha exito Maickel Melamed a caba e New York City Marathon, Berlin Marathon, Chicago Marathon y e Boston Marathon. Ademas di core marathon, Melamed a subi e top di sero mas halto di Venezuela, esta Pico Bolivar.
