SEPPA ta e sindicato cu ta representa e trahadonan di AruParking. Por tende yen di cos den e gobierno cu ta na mando awor aki. Un di e partidonan a bisa cu nan lo cera Aruparking e tempo aya. Awe nan ta na mando. No ta sinti cu no lo bay cer’e. No tin entrada, etc. pa parkeo.
Segun Magaly Brito, secretario general di e sindicato, a yega net un aña cu por bisa cu a tuma e decision, unda cu a pone un paro na e actividadnan di AruParking. Esaki tabata tin su consecuencianan pa e compania aki, cual ta uno 100% di pais Aruba, pa falta di entrada, apesar cu por bisa cu Gobierno a sigura cu pa cualkier falta di entrada nan lo para responsabel. Tin cu bisa cu un aña despues, e compania ta mas atras el a keda bay y awendia e ta mas atras cu nunca.
Tin un insiguridad hopi grandi bao di e trahadonan aki cu si keda traha si of no pa un empresa cu ora cu a lant’e, tabata tin asina tanto promesa y tabata por a mira cu tabata tin tur muestra cu e lo bay dilanti y tabata crea un siguridad enorme bao di su trahadonan, awendia e no ta existi.
E trahadonan ta hopi demotiva, pa motibo cu no sa kico lo sosode. A pidi gobierno actual claridad, kico lo bay para di e futuro di e trahadonan y di e empresa. A indica na comienso di aña cu lo tin cu warda, pa motibo cu lo traha riba un plan y cu lo duna un claridad. Tin cu bisa cu recientemente tabata tin un encuentro cu e minister encarga y a duna e informacion cu nan ta casi cla. Por bisa den dos siman mas nan lo duna un claridad riba e maneho nobo cu ta bay hiba pa loke ta existencia di AruParking. AruParking lo bay keda existi.
E trahadonan por ta sigur di nan empleo. No mas cu gobierno lo bin cun’e den un bachi nobo. Nan lo trece claridad si e mesun suma cu tabata wordo cobra si esey lo sosode. Si e mesun cantidad di zonanan lo bay keda si of no. Si ta amplia tambe e asunto di parkeo y ta bay mas aleu cu Playa y lo sigui banda di e hotelnan si of no. E claridad aki lo wordo duna hopi lihe. Pa comienso di Juni lo calcula cu lo tin un maneho totalmente nobo. E informacionnan aki ta trece un alivio pa e trahadonan. Tabata tin hopi mal contento riba e asunto di parkeo. Pero sa tambe cu despues di un aña di ta den e forma aki. A bin tambe hopi peticion di hasta e propio comerciantenan pa AruParking of gerencia di esaki, bin bek cu e asunto aki, pa motibo cu awendia bo ta bay den Centro di Oranjestad, bo no ta haya ningun caminda pa parkeer. No solamente pa esnan cu kier haci compras den caya grandi, pero tambe pa esnan cu ta haci otro tipo di negoshi rond. Ta contento na final cu lo bin claridad, principalmente pasobra ta papia di trahado, di tata y mamanan di famia, cu a confia riba un trabao cu a brinda na nan y cu awendia ta manera on hold.
