Lydia Emerencia, tabata rector na Universidad di Aruba entre 2002-2010. Diabierna mainta 8 di september 2023, durante apertura di aña academico 2023-2024 na Universidad di Aruba, den pleno celebracion tambe di nan 35 aña di aniversario, nos a combersa cu Lydia Emerencia un rato. E ta bisa nos cu e ta haya cu e 35 aña aki ta demostra cu Universidad di Aruba tin tur derecho di existencia.“Universidad di Aruba a duna un contribucion substancial na formacion di liderazgo na Aruba, esey a bini hopi cla dilanti den e presentacion di e alumni, e hendenan cu a caba nan estudio na Universidad di Aruba. Y cu a mustra hopi cla e contribucion cu Universidad por a duna nan den nan formacion profesional personal y con nan na nan turno ta dunando un contribucion masha importante na desaroyo di Aruba”, Emerencia ta expresa.
MAS ENFOKE RIBA TERENO SOCIAL Y CULTURAL
E academico a sigui splica cu un parti hopi importante ta pa Universidad di Aruba den e caminda su dilanti, pa duna un enfoke hopi importante na tur loke tin haber cu desaroyo riba tereno social y cultural. Tur e islanan den region ta lucha tremendamente pa loke ta e parti di mantene cultura, pa mantene e aspectonan original y casi indigena di nos cultura.
