Despues di dos aña largo, e di cuatro Annual Long Table Aruba organisa pa Wind Creek Aruba ta bek na nos isla cu un “white-hot dinner” pa un anochi cu a wordo cataloga di ta “E unico cena cu un balor di $ 40.000 na Aruba”.
E aña aki e evento ta programa pa tuma luga diadumingo 28 di augustus y lo encera e tan gusta mesa di 1.000 pia largo cu lo sinta 1.000 invitado, situa pafo di Renaissance Wind Creek Aruba Resort den centro di Oranjestad, cu bista pa e Marina. Ticket lo costa $40 pa persona y lo ta na benta cuminsando dia 15 di juni. Desde su creacion na 2017, Long Table Aruba a recauda mas di $75.000 na beneficio di diferente organisacion caritativo na Aruba y ta e “evento estrella” di e operacion di Wind Creek Aruba.
E evento di e aña aki lo marca e di cinco aniversario cu Wind Creek Aruba a tuma over Renaissance Aruba y pa celebra e logro aki Wind Creek Hospitality lo haci un donacion di $40,000 na un organisacion caritativo local – un suma cu ta mas grandi cu tur e donacionnan di e Long Table anterior.
“Nos propiedad globalmente ta comprometi pa incorpora nos mes den e tela d e comunidadnan caminda nos ta biba y traha”. Esey ta e palabranan di Gerente General di Wind Creek Aruba, Paul Gielen. “Eventonan manera Long Table Aruba ta ofrece hospitalidad den e miho sentido di e palabra – un chens p’e miembronan di nos comunidad comparti y brasa otro; tur esey mientras cu nan ta curasha e spirito solidario cu cual ta haci e isla aki mas cu un hogar pa hopi di nos.”
E evento di e aña aki lo conta cu un proceso dirigi riba nos comunidad pa elegi e organisacion caritativo cu lo beneficia di e donacionnan, cual lo wordo anuncia despues. E impacto riba comunidad y ayudo ora di calamidad ta un principio di Wind Creek Aruba su operacion. Desde su yegada riba nos isla, Wind Creek Aruba a recauda fondo a traves di su eventonan distintivo, Long Table Aruba y Winter Wonderland, ademas di ofrece varios donacion hospitalario y di cuminda durante henter e aña na diferente organisacion cu tin mester di apoyo ora di desaster.
Gielen a continua: “E ultimo dos añanan a trece momentonan dificil, pero tambe speransa pa nos isla. Nos kier tende directamente for di organisacionnan kico ta nan necesidadnan, con nos por yuda haci un impacto y con nos por uza e percepcion di e comunidad pa evoluciona nos programa di donacion.”
Nos ta keda na espera di comparti e detayenan cu boso pronto y pa wak e Long Table bira un realidad pa un anochi inolvidabel.
