Guillermo Scarpantonio, presidente di AKB Fintech, a anuncia e implementacion di caheronan automatico of ATM cu ta saca dollar cash. Ya nan ta na Venezuela. Na principio lo tin tres, na Caracas, Valencia y Barquisimeto. Lo dispensa un maximo di 200 dollar y lo cuminsa traha dia 7 di november.
“E ta un hecho. Nos ta bay cuminsa cu e tresnan aki, pero nos lo bay instala mas. Nos ta den e detayenan di prueba pa tur cos ta bon y nos no sufri problema,” Guillermo Scarpantonio, presidente di AKB Fintech a indica na Roman Lozinski.
“E sistema ta directamente relaciona na e carteranan den dollar di AKB. Tur cos cu tin placa eynan por saca dollar cash. Esey abo lo por haci’e den diferente forma: si bo ta un freelance of bo ta un desaroyador di WEB y bo dunadonan di trabao of clientenan ta pagabo na cualkier parti di mundo bo por conecta bo Paypal wallet na nos wallet of cartera. Bo por recarda un gif card y bo ta download’e den bo e-wallet di AKB y despues bo por saca e dollarnan cu bo tin riba bo cuenta,” el a splica.
“Esaki ta novedoso. E ta un ATM cu no ta bay funciona cu un debit of credit card convencional. E ta un carchi virtual cu e plataforma ta genera, cu ta un carchi cu bo lo por bay tin den bo celular, cu un codigo di un solo uzo, y lo bo bay tin bo identificacion y e cantidad cu bo ta bay saca. Esey bo ta hink’e den e ATM y esey lo bay dispensa bo placa,” el a señala.
Caheronan na dollar: peticion
Scarpantonio a señala cu e clientela cu ta manda placa Venezuela a pidi esey pa nan famianan. “Awe por manda dollar directamente na e e-wallet,” el a puntualisa.
El a bisa cu por saca maximo 200 dollar pa dia, minimo di 20 dollar, den biyetenan di 5, 10 y 20 dollar.
“E dollarnan ey no ta bay di un punto pa otro. Ta dollarnan cu ya ta den e establecimentonan. Nos no ta bay pone na riesgo bida di e personanan pa haci e traslado di dollar. Simplemente nos ta bay uza e puntonan di benta cu ta genera benta en efectivo den volumennan interesante y e mesun placa aki lo ta obteni for di e comercio aki cu ta bay yena e ATMnan,” el a subraya.
“E ATMnan lo bay ta na e puntonan strategico unda cu tin acceso na transporte publico, parkinglot, cu ta cerca di e Metro, pa e personanan tin’e facil unda e ATM aki ta y por saca dollar dentro di e comercio aki, unda cu por hasta haci un compra,” el a agrega.
El a splica cu e ATMnan aki por ta ubica na botica, supermercado of hardware store.
Sudeban no a fiha posicion
Scarpantonio a señala cu no lo tin un posicion di Sudeban of Banco Central de Veneuela, a e tenor aki. “Esaki ta un proceso tecnologico cu no ta regula pa un ley specifico. E ATMnan aki ta propiedad di esnan cu tin’e de su establecimento,” el a aclarea.
“Loke nos ta brinda ta un plataforma pa e comercio aki por bancarisa internacionalmente su dollarnan cash cu ta pega na Venezuela y mester manda den exterior pa por sigui importa mercancia of materia prima of paga nan proveedornan internacional,” el a agrega.
