Ministerio Publico a informa awe cu dia 15 di november proximo, esta otro siman diaranson, e periodo di “gevangenhouding” di 60 dia otorga na Minister Paul Croes ta termina. Prome cu esey, Fiscal lo pidi Hues Comisario pa bolbe prolong’e cu 30 dia mas. Esey lo bira e ultimo prolongacion prome cu e sospechoso por mira un Hues pa tratamento di su caso.
Manera ta conoci, dia 12 di september ultimo, algun dia prome cu eleccion, Hues Comisario a aproba prolongacion di Minister Paul Croes cu 60 dia mas, cu awor lo ta terminando.
Di acuerdo cu nos Codigo di Procedimiento Penal, Fiscal por pidi Hues Comisario pa prolonga e periodo di “gevangenhouding” dos biaha. El a haci esaki un biaha caba pa 60 dia y awor ta considerando pa pidi 30 dia mas, cu lo termina e ora den December. Pa e tempo ey si e proceso mester ta asina leu pa presenta e acusacionnan formal contra e sospechoso dilanti Hues, aunke sea “pro forma”.
Ministerio Publico ta acusa Minister Paul Croes di soborno ambtelijk (pasivo), verduistering, labamento di placa, falsificacion y di mensensmokkel. Dia 21 di augustus a detene y despues di 10 dia na Warda di Polis, a mande KIA. Mester menciona cu e mandatario, aunke demisionario awor, ta encarcela den KIA y ainda cu “beperking”, pues sin contacto cu ningun hende, no por mira ni señora ni yiunan, no por ricibi ningun bishita cu no ta di su abogado.
