Aunke cu a reuni y negosacionnan a alcansa un nivel bastante avansa cu AIB Vastgoed pa compra y renobacion di e edificio den beslag, conoci como Cumana # 69, toch na final no a logra avansa suficiente pa por yega na un acuerdo. Gobierno a opta pa bay mesa cu e fondo di pensioen di empleadonan publico, APFA. Parce cu ey e negosacionnan a bay miho, te cu awe a firma un acuerdo di principio.
Minister Andin Bikker a duna oido na esaki y na 2019 a logra muda cierto departamentonan cu antes tabata na Frankrijkstraat pa un edificio mas nobo y amplio situa na Wayaca, completamente adapta na e deseonan di polis. Tambe a establece e departamento di ‘Tourism Oriented Policing and Security’ (TOPS) na e edificio di Arubus riba L.G. Smith Boulevard, pues central den e shopping area di turismo crucero.
Den cuadro di e esfuerso pa por sigui aloca mas departamentonan di Cuerpo Policial den edificionan mas central y moderno, adapta specificamente na e deseonan di polis, Minister Andin Bikker awe a firma un acuerdo di principio cu APFA, pa hunto bay explora e posibilidadnan pa cu sea edificonanan existente of desaroya uno nobo. Den e cuadro ey ya a identifica un edificio cu tin preferencia di polis den un area hopi central y APFA a encamina un proceso den un esfuerso concreto pa por adkerie y adapt’e na deseo di polis.
Como e fondo di pensioen mas grandi na Aruba di empleadonan publico, empleadonan di companianan di Gobierno y institutonan subsidia dor di Gobierno, APFA ta un partner logico y ideal no solamente pa e proyecto aki, pero tambe pa mas proyectonan di Gobierno den futuro, ya cu e inversion ta bay na beneficio di e fondo di pensioen, pa por sigui reenforsa e base solido di pensioen di empleadonan publico y di tur otro entidad pa cual APFA ta encarga cu e maneho fondonan di pensioen.
Cuerpo Policial Aruba tabatin wowo riba ex edificio di John F. Kennedy School, despues riba ex edificio di DOW den Paardenbaaistraat, despues riba Brown Building na Wayaca y awor riba e ex edificio di Codemsa na Cumana. Pero como cu e huurdo no por keda cla cu compra di e edificio, pa por yega na un acuerdo cu DIP, awor a presenta un otro alternativa riba mesa.
E edificio riba su mes ta bon situa net banda di un rotonde cu ta conecta Watty Vos Boulevard, caminda pa Santa Cruz, Oranjestad y mas. E edificio ta grandi, den cual por inclui varios otro departamento di Polis aden of kisas hasta otronan cu ta resorta bou di Ministerio di Husticia. E lo por traduci den cortamento di huur den otro edificionan. Pero, aki atrobe Gobierno tabata na mesa cu un intermediario y no cu doño di e edificio.
TOCANTE E EX EDIFICIO DI CODEMSA
A construi e edificio na aña 1996 riba un total di 8 diferente tereno combina y pega na otro, conoci bou di e adres Cumana # 69. Na tur e tin un area di 21.255 m3. Na tur tin 6.908 m2 di espacio na oficina den e edificio grandi aki, cu inicialmente a traha pa negoshi y warehouse. E ta parti den e edificio principal di 5960 m2 sigui pa un edificio adicional den cura di 948 m2 y un espacio pa “storage di 456 m2. E doño kier bende pa Afl. 8.934.660,=. Por corda cu e comerciante Johnny Chemaly tabata envolvi cu Codemsa na su inicio y despues a pasa pa Edwin Thiel. Retonan a presenta y algun tempo pasa e compania a bay bancarota
WARDANAN DI POLIS SA TA PPP
No ta nada nobo, esta cu un compania ta financia, construi y mantene edificio como Warda di Polis. Aki na Aruba, e Ward’i Polis di Noord y esun di Santa Cruz, ambos ta via un fiansa den un construccion cu e compania ALBO. Ta for di aña 2004, tempo cu Rudy Croes tabata Minister di Husticia a regla e “deal” ey. Y Polis te awe ta contento cu ne pasobra e compania ta encarga cu tur “groot onderhoud” y Polis mes ta haci e trabounan di reparacion facil y chikito. Awor aki e unico Ward’i Polis di Gobierno ta esun na San Nicolas, pasobra esun cu ta uzando den Wilhelminastraat ta di FCCA.
