Kico ta spera pa Fundacion Parke Nacional Arikok den 2018 pa loke ta existencia y sigui aumenta di bishitante, ta un pregunta cu nos a haci na Carl Quant, Marketing & Communications Manager di Parke Nacional Arikok.
El a splica cu pa 2018 ta mirando riba e implementacion di e plan di maneho di Spaans Lagoen. Esaki ta conta caba na comienso di Januari y ya e procesonan aki a cuminsa, unda cu ta poniendo diferente borchi di informacion y reglanan pa e area di Spaans Lagoen. Lo cuminsa di biaha tambe den e prome kwartaal riba e plan di maneho pa Parke Nacional Arikok, cual sigur lo ricibi su debido atencion na tur e areanan caminda cu lo analisa diferente proceso cu ta pasando den Parke y asina haci’e uno miho pa e bishitantenan local y internacional y sigur nos muchanan, cual lo disfruta di esaki.
Lo mira bek riba proyectonan cu lo sigui cu nan, cual ta e Junior Ranger Program, cual tin dos campamento den aña. Uno cu lo tuma luga na April y uno na October. Tambe lo mira bek na diferente proyecto cual tabata un exito den 2017, cual tabata e siman di tribon. Lo cuminsa tambe cu e proyecto tambe di Best of Bat, cu ta pone un enfoke riba Raton di anochi. Sin laga afo cu tambe kier cuminsa un paar di sondeo mas riba e shoco y prikichi. Tin algun proyecto cu ta cla pa start den Januari, cu ta conta cu asistencia di comunidad. E comunidad mes por keda pending via website, y tambe pagina di facebook y rednan social, unda cu ta pidi asistencia pa e proyectonan aki.
Aumento di entrada
E ta facil, segun Quant. Si localnan bishita e parke regularmente, por pidi nan pa cumpra un jaarpas, cual ta 28 florin so pa aña. Tin prijs special tambe pa famia. Si nan ta hendenan cu ta bishita e parke regularmente, lo invita nan libremente pa pasa na Parke. Lo brindanan e jaarpas, caminda cu nan por uza esaki como entrada.
Pa famia cu tin bishitantenan internacional, si tin famia di Hulanda, di Merca, cu ta bishita, trece nan parke libremente. Lo brindanan un otro parti di Aruba cu no ta mira normalmente. Tambe e localnan, cu hopi biaha ta bisa cu nunca a yega parke. Hopi hende ta bisa cu ta asina leu, pero ora cu bay eynan, ta 5 pa 10 minuut so for di Oranjestad, cual den un rato bo ta yega. Tambe e ta cuminsa na nos scolnan. E concientisacion ta na e muchanan. Si e muchanan mes ta pidi mami cu papi pa pasa bishita parke, riba diasabra y diadomingo, por haci esaki. Recordando tambe cu e parke ta habri 7 dia pa siman, for di 8’or di mainta pa 4’or dia atardi.
Despues di orario normal
Tin orario cu kisas hendenan kier bin, cual no ta orario tempran. Ta importante pa menciona cu parke ta cera 4’or di atardi, ya cu no lo bay tin ningun ranger visibel, pa si mester di asistencia. Loke si ta importante pa remarca, cu si tin auto ainda despues di 4’or di atardi den parke, ta recomendabel pa sali prome cu bahada di solo. Despues di esaki e fauna ta hopi activo, esta hopi di e bestianan ta activo na e momentonan ey y ta un peliger pa nan. Tin hopi bestia cu ta den peliger di existencion, manera cascabel, boa y tambe e santanero, cu ta sali primeramente atardi y anochi. Raton di anochi tambe. Mayoria biaha pa proteha y conserva e naturalesa. Ta pidi pa tene na regla di parke, cual ta entrada 8’or y ta cera 4’or. Pero si tin hopi hende cu ta uz’e pa deporte tambe, cual ta bin, cana, nan tin mountain biking y nan ta haci uzo di dje despues di ora, pero nan ta sali prome cu bahada di solo. Na pia of bicicleta por pasa, pero vehiculo di motor, preferiblemente cu no, segun Quant.
Entradanan
Awendia ta relativamente druk. Por conta cu un averahe di 150 pa 200 bishitante. Pa yega den parke tin 3 entrada oficial. Tin entrada na Shete, cual ta wordo hopi uza pa bay Conchi. Tin entrada ta na San Fuego, cual ta bay na e centro di bishitante y tin entrada na Vader Piet, cual ta banda di e molinanan di biento.
Plan pa cera Conchi?
Ta keda un punto di interes asina grandi, pasobra riba un dia normal, e ta ricibi asina hopi 
bishitante y esaki sigur ta un di e puntonan di accion riba e lista mas na halto, pa mira bon por mehora esaki pa no solamente e bishitantenan so, sino pa e Touroperatornan tambe. Tur ta hunga un rol grandi den esaki. Pa e experiencia di e bishitante, e no ta uno mas miho. Si tin un 50 pa 80 hende pareu den Cochi. Pa cuminsamento di aña lo haci un sondeo, pa wak con ta mehora e servicio na Conchi. No solamente pa nan, pero tambe pa e bishitantenan.
