Manera ya caba ta conoci, e dos entidadnan di mas importante di turismo di Aruba a biaha pa Chile y Peru pa atende cu varios reunion cu diferente aerolinea. Un di e aerolineanan cu nan a reuni cu ne ta LATAM. Esaki den cuadro di e vuelo inaugural diasabra awo for di Lima, Peru pa Aruba.
Andreas Schek, Vice-presidente di Benta y Branding na LATAM, a reuni cu Aruba Airport Authority y Aruba Tourism Authority. “Nos ta hopi contento di bolbe bek cu e ruta aki cu nos a stop cu ne poco prome cu pandemia”, asina Schek a duna di conoce. Durante e reunion a atende cu e strategianan di mercadeo y con nan lo atende cu e fluho di pasahero y turista pa Aruba. Sin duda, LATAM ta masha contento y satisfecho di a regresa cu e ruta aki.
LATAM ta grandi den Latino America
E bon di e red di LATAM ta cu nan ta conta cu e hub di Lima, cu ta e ruta cu nan lo haci uzo di dje pa Aruba. Nan tin feeder for di Sur America completo, pues Brasil, Argentina, Chile, Uruguay y Paraguay. E ta un hub masha importante cu nan ta permiti pa hiba un fluho di turista pa Aruba. A traves di e punto aki por conecta Sur America completo cu nos isla.
Plan pa futuro
N’e momentonan aki, nan lo mira con e ruta di Lima ta funciona. Actualmente nan ta conta cu tres frecuencia pa siman cu ta diahuebs, diasabra y diadomingo. Segun nan sigui crece nan lo evalua pa aumenta e frecuencia for di Lima y claro, bin cu mas destinacion.
Aña 2023 tabata un aña di recuperacion pa e aerolinea LATAM. Nan ta casi yega e mesun cantidad cu aña 2019. Awendia e red di destinacion ta mas fuerte compara cu prome cu pandemia. Nan a caba di estrena cu Delta cu ta conecta Latino America cu Merca di un manera fuerte. E unico vuelo internacional cu nan no a bolbe cu ne ta Tel Aviv. Ademas den vuelo domestico nan tin 10 destinacion mas na Brasil y Colombia. Te cu awo e red ta mas fuerte compara cu prome.
Servicio ta algo primordial pa LATAM, pa e aerolinea ta importante pa tin bon prijs y bon orario pa e clientenan cu nan ta brinda servicio na dje.
