Manera ta un tradicion di e ekipo di femenino di La Fama, despues di torneo of campeonato, ta sinta refleha riba e torneo of campeonato cu a tuma luga y e biaha aki tabata resumen di e torneo 8 vs 8 y Copa AVB cu a termina siman cu a pasa.
Den e torneo pa Copa AVB e ekipo a confronta varios contratiempo pero e hungadonan disponibel a sigui traha duro y a termina na di cinco puesto, dialuna anochi a sinta hunto cu e miembronan di e Comision di Damas pa papia riba loke a tuma luga y tur hende dunando nan pensamento riba e torneonan.
Den e weganan final La Fama tabatin varios hungado regular for di accion, algun cu a biaha, otronan cu tabata malo di salud mientras cu un di e hungadonan grandi di e ekipo Shadira Croes, a sufri un lesion serio den e prome wega di Copa di AVB y no a mira accion mas den e torneo.
Su recuperacion ta riba bon caminda y pa e campeonato di futbol 2021-2022 di AVB cu ta programa pa inicia na luna di october venidero, Shadira lo keda cla pa hunga atrobe.
Un revelacion sin duda tabata e rol cu varios hungado a logra den e torneo ultimo, entre nan Hadassha Kock kende normalmente ta e portero estelar di e ekipo, a bay reforsa e atake di La Fama y a sorprende anotando varios gol pa su ekipo.
Den gol a bay hunga Tatiana Dangond kende normalmente ta marcado di punta den defensa pero un lesion di hamstring a pone cu el a yuda den gol y tambe a sorprende tremendo pa e esfuerso cu el a haci mientras cu tambe por a mira e medio campista Stacey Lampe, crece y bira importante pa su ekipo cu tremendo actuacion den medio campo.
Otro estelar cu tambe a sobresali formando e base di e ekipo na tur momento por menciona Michelline ‘Mimi’ Weller, Jeanella Kock, Louijane Thijzen, Asher Kock, Kimberly Soliana, Francien de Windt, Leanne Leonardo, Lorraine Oduber y Jereline Ras kendenan tambe a traha duro pa carga e ekipo den tempo dificil.
Varios hungado kende apenas a bira miembro di La Fama, a yuda e ekipo den e ultimo weganan manera entre otro Sharaidy Kelly, Silianne Croes, Jiolinne Maduro, Mireya Weller y Ng Wianan.
Na final di e reunion dialuna anochi, Comision a honra e hungado cu sin duda tabata e MVP den e dos torneonan, esta e medio campista Edriana Molina, kende a desaroya su mes formalmente den ultimo aña y den e dos torneonan a carga e ekipo tanto den e parti defensivo como ofensivo, semper yudando otro unda cu e por den wega di e ekipo.
Miembro di e comision, Lindy Kock a haci entrega di un placa di aprecio y reconocemento na Edriana Molina pa su tremendo actuacion y su dedicacion semper na su ekipo en general.
Na mes momento comision a repasa e plannan pa campeonato 2021-2022 cu lo inicia na luna di october proximo caminda La Fama sin duda lo ta ‘back on track’ pa esaki y finalmente a yama danki na tur e hungadonan pa nan esfuerso y dedicacion.
Por ultime a despedi tambe di Jiolinne Maduro kende otro siman lo bay residencia na Hulanda cu su famia.
