Presidente di Camara di Comercio Gavril Mansur tambe ta na Colombia den e mision comercial organisa pa Gobierno di Aruba ta compañando Minister Geoffrey Wever den e diferente reunionnan cu tin. Diabierna e mision comercial a culmina.
BBO NA FRONTERA
Mansur a indica cu e tin di compronde cu ya e ley di BBO na frontera a yega Parlamento y e ta publico ora cu a puntr’e pa su opinion riba e tema aki, cual sigur hopi hende ta pendiente pa cualkier comentario cu tin riba dje.
E ley aworaki lo por ta revisa door di tur hende. Camara di Comercio no a haya chens pa mira e ley y tene un reunion riba dje ainda, p’esey e no por bisa mucho riba dje.
Loke cu Mansur por a bisa cu gremio y Camara di Comercio tabatin algun preocupacion cu cierto cosnan, por ehempel e definicion di ‘handelsgoederen’. Pasobra e aftrekbaarheid ta conta solamente pa ‘handelsgoederen’. E ora e pregunta naturalmente ta bin pa sa kico precies ta un ‘handelsgoed’. Esey tabata un di e puntonan cu tin e atencion di tur hende. Si no defini cos bon, dado momento no sa con e ta bay traha. E por tin un efecto grandi, segun Gavril Mansur.
HIPERINFLACION
Riba e pregunta si por tin consecuencia pa inflacion debi n’e BBO na frontera, ta algo cu Mansur a splica cu e no lo bay profundisa aden pasobra e ta un bankero y no un economista. Sinembargo el a indica cu segun e tin di compronde cu si, e por trece mas inflacion cu ne. Cuanto si e no por a bisa, pero berdad tin un bon chens cu e lo por trece inflacion.
AINDA TA KERE DEN BTW
Inicialmente y ainda tur ta kere den Camara di Comercio y mayoria di e gremionan cu ta delibera cu nan, tambe ta di opinion cu un sistema di BTW lo ta miho, p’e simpel motibo cu e sistema aki ta completamente ‘uitgewerkt’. No tin mucho duda con e ta hinca den otro, no tin duda den definicion. E ta un sistema cu ta existi caba na un cantidad di pais na mundo.
E tin su desbentahanan berdad, pa ta un tiki compleho pa cierto negoshinan por cumpli cu tur e reglanan. Camara di Comercio ta sinti pa un BTW bon diseña. Pasobra si bin cu un BTW cu tin tres of cuater diferente tarifa cu tin yen di ‘uitzondering’ e ora e ta bira un problema. Camara di Comercio ainda ta kere den un sistema di BTW ainda, pero un sistema implementa mas simpel posibel, pasobra e por bira complica. Hopi biaha na Aruba por mira cu ta introduci cierto leynan. Tin di compronde tambe cu dia prome di juni no ta alcansabel y lo ta awo dia prome di juli, cual ta un tiki mas tempo.
MESTER MAS INFORMACION
Pero kisas toch no tin suficiente informacion ainda. Aworaki tin cu bay door di e ley. Tur e lunanan aki ta papiando di dje, ta speculando hopi biaha. Berdad si ta cu DIMP a duna sesion informativo cu ta hopi util, pero den hopi detaye mes no tin e contestanan. Awo cu ta haya e ley, por bay profundisa den dje cu awo sa kico ta pasando.
Mansur a menciona cu no a mira e ley ainda. E mes no a les’e ainda. Kico cu bin cu ne, mester duna tempo. Lo mester bin un fase transitorio den esaki, pero aki no lo t’e caso. Dia prome di juli, t’e fecha fiho. Esey por ta toch ta un tiki ‘short term’ pa hopi compania prepara p’e.
Pa mas detaye lesa TREMPAN.
