Tabata tin otro temanan cu a wordo trata cu ta menos relevante pa loke ta JVO. Esakinan ta temanan cu a resalta cu tabata tin mas discusion y a tuma mas tanto tempo pa yega na otro riba dje. Pero asina tin otro aspectonan manera kustwacht, ta un di nan cu tambe ta un di e temanan cu ta bin riba agenda. Siguiente beleidsplan di kustwacht tin cu bin pa otro aña y a keda palabra tambe cu esaki lo wordo presenta den un tempo avansa of di adelanta na e diferente partidonan pa por na JVO trata e meerjaren beleidsplan di kustwacht den JVO pa asina e por conta cu sosten di tur partido. Kustwacht ta un responsabilidad di e ministernan di husticia di reino, caminda cu nan ta bay over di e maneho y awor aki e siguiente plan pa e proximo tres añanan lo wordo prepara y lo wordo presenta na JVO den e siguiente tratamento.
Tin discusion y a plantea tambe nan preocupacionnan pa e parti financiero di kustwacht, pasobra tin diferente inversion cu tin cu wordo haci, diferente material cu tin cu wordo reemplasa. Tin discusion na Hulanda over di nan budget. Na e momento aki no ta asina leu cu defensa a prepara nan begroting pa por reemplasa e materialnan cu tin cu wordo reemplasa, pero Aruba a pidi atencion pa esaki. E coleganan cu tabata tey, den e caso aki di e departamento di Husticia, e ministerio di husticia di Hulanda a keda di pone e tema aki riba agenda di Hulanda. Normalmente ta binnenlandse zaken ta bay riba e aspecto di presupuesto di operacion, y e presupuesto di material ta cay bao di defensa y esey tin cu wordo trata den tweede kamer Hulandes y e ministerraad Hulandes. A expresa en todo caso di Aruba. Minister Dowers a expresa e preocupacion pa e hecho cu e no ta cla ainda, cua ta e inversionnan cu ta bay wordo haci y si esaki ta bay wordo poni disponibel. A pidi si acaso lo bin cu cambio, pa Aruba wordo informa na tempo pa por percura pa tuma e medidanan necesario, pa no perde e facilidadnan cu nos tin na e momentonan aki.
