Aruba Tourism Authority (A.T.A.) hunto cu diferente instancia gubernamental a lansa e programa di Aruba Health and Happiness
Code (HH Code) cu e meta pa sigura cu protocolnan di higiena y salud ta na un nivel cu nos bishitantenan ta spera ora di
bishita un destinacion turistico manera Aruba. Sigur cu nos turismo ta biniendo bek fuerte y pa oficina di turismo e ta di sumo importancia cu nos companianan local ta sigui provee e miho servicio y producto posibel asina garantisando cu nos ta un destinacion cu ta keda “safe” pa bishita.
Den e simannan binidero e instancianan lo controla e diferente organisacionnan di tour cu a inscribi pa e programa Aruba Health
& Happiness Code pa por duna nan e seyo maximo, pues e seyo di oro. Diahuebs dia 3 di juni di 8:00 am pa 11:00 am lo tin un drive thru controle dilanti oficina di turismo, L.G. Smith Boulevard 8, pa tur tour operator cu tin vehiculo y nan lo por trece esaki na e parkinglot pa control.
Manera ta conoci caba, den e proceso di HH Code, ta sigura pa e parti di protocol di higiena como tambe ta sigura cu e vehiculo ta cumpli cu tur rekisito pa por ta riba nos camindanan. Un palabra di pabien ta bay na Kini Kini Tours and Transfers cu a logra haya su Gold Seal pa Bus & UTV/ATV. Sigur un bunita logro.
Aruba ta goza tambe di hopi evento pa nos bishitantenan, pues ta un parti cardinal pa por otorga e seyo di oro na e partnernan den e mundo di Meetings Incentives Conferences & Events (MICE). Ta otorga e seyo aki pa medio di un entrevista unda ta repasa e protocolnan y pa conclui cu e ta bon hancra den e procedura di e companianan.
Un palabra di pabien ta bay na e prome companianan cu a ricibi e seyo di oro, cu ta:
- House of Mosaic, Ceremonies & Celebrations
- Amsterdam Manor Beach Resort & MVC Eagle Beach
- The Little One
Companianan cu kier ricibi mas informacion por semper manda un email na [email protected]. Si bo ta registra pero no a ricibi un email ainda, verifica e spam of junkbox prome cu comunica na e e-mail menciona. Ta conta cu e motivacion y aporte di cada un di nos pa haci e cambio positivo pa Aruba.
