Calvin Maduro ta un di e pilarnan di e evento King of the Hill, cu ta wordo presenta pa e marca local Aruba Rocks, ta bin cu elementonan di Aruba den un manera pa moderno pa promove nos isla.
Nan tin diferente shirts y keds ta andando riba caya pa basta tempo. Awor aki a cuminsa cu nan prome evento, cu tambe ta enfoca riba un otro elemento di Aruba, esta Hooiberg.E competencia aki lo ta uno pa tur local. A invita tur hende cu ta sinti nan tin’e pa subi Hooiberg den un tempo record.
No tin un tempo record vast ainda. Un cos si, tur esnan cu a registra mester a subi Hooiberg dentro di seis minuut, pa por participa.
Tin awor un total di casi 70 participante te asina leu. Tambe tin algun team relay (teamnan di 5). Fuera di esey lo bay tin un tremendo BBQ di Casibari Cafe pa e fanaticonan. Lo bay tin bon bar.
https://www.facebook.com/24ora/videos/355189141694436/
Lo bay tin un invitado special for di Finlandia, Morten Bustrum, kende ta biba na Suecia. E ta e Fastest Steerrunner di mundo. Esaki lo bay ta un show pa henter pueblo bin mira.
Ta algo cu no ta pasa tur aña.
Maduro ta invita henter pueblo di Aruba pa nan tey diasabra awo, for di 1’or di merdia pa 6’or di atardi.
Aruba Rocks, apesar cu e ta un marca di paña, pa propaga Aruba tabata pensa cu kier coy diferente angulo pa infiltra e mercado miho. Pensando riba esey a pensa riba un evento, pero ki evento y pa ki motibo.
Mirando cu Maduro pa hopi tempo mes tabata skate y mirando cu Aruba Rocks tin su parti extremo, a pensa e ora riba algo extremo y atletico. Pensando riba elementonan di Aruba, y combina cu extreme, Hooiberg a pop up. Esaki a keda desaroya te cu nan ta cla pa diasabra.
E nomber ta King of the Hill, pero ken cu yega por bira hasta Queen of the Hill.
Mas informacion
Pa mas informacion por tuma contacto cu nan riba Facebook riba King of the Hill Aruba. Tambe nan tey riba Instagram y si kier registra, ainda awe nan ta na tempo, door di registra riba kingofthehillaruba.com. Eynan tambe ta haya tur informacion, e rekerimentonan y bo tin cu paga 35 florin na Ibisa. Bo ta haya un pechi, un boter di awa di Gatorade y na final di e careda ta haya un medaya di e mascota como recuerdo.
E ganado ta haya e medaya di oro.
Como cu e ta un non-profit event, no tabata e intencion nunca pa saca algo di dje, sino mas bien e branding di Aruba Rocks como marca, pero tambe pa yuda duna bek na un ke otro fundacion.
A scoge e ora cu fundacion Autismo ta e promenan pa traha cu nan y duna bek. Segun e otro añanan ta bayendo ta wak si ta sigui yuda nan of ta scoge un otro fundacion.
