E kehonan ora cuminsa haya problema cu riñon ta entre otro cansancio, bo no tin energia mas, grawatamento, bo no tin apetit, peso ta baha, of bo peso ta subi debi na vocht, bo no por drumi straight, of problema pa cana.
Hopi biaha si bo ta avansa y bo ta sinti e kehonan aki, e riñonnan ta traha di 10 pa 20%. Ya e riñonnan a bay hopi atras. Si nan ta traha mas of menos un 30%, bo no ta sinti hopi. Dokter Zaheeb Choudhry a splica cu bo por cana rond y bo riñonnan no ta traha bon, bo no ta ripara. Ta te ora cu nan bay atras, e ora bo ta ripara esey. Ora e riñonnan no ta traha bon, nan ta daña, no por drecha esaki bek. Si e riñonnan ya ta daña door di e sucu y presion y trahando riba un 20%, no por bay mas atras. Tur cos cu ta kibra, ta kibra. Esey ta encera cu for di tempran nos mester tuma prevencion. Si nos mester mira e dokter, ta nifica cu ya e riñonnan ta daña y ta purba di evita pa e bay mas atras. E lo sigui bay atras y si ta trahando riba un 20%, mester bay dialyse. Pesey ta importante pa for di tempran, hiba un bida saludabel, no huma, come cumindanan saludabel, no bebe refresconan cu hopi sucu, alcohol. Ta intervencionnan importante, cu ta mesun importante cu remedi. Unabes cu e riñon no ta traha bon, ta pasa pa dialyse.
Dialyse riba e isla, segun e dokter, no tin un bon nomber. E no sa dicon e ta wordo asocia cu morto, pero dialyse ta un tratamento cu riba dos manera por wordo haci, uno via sanger y e otro ta via barica. Dialyse ta reemplasa e funcionamento di e riñon. E mashin ta laba e sanger of ta haci e barica limpi.
Cantidad di pashent
Actualmente tin mas of menos 120 persona cu ta dialysa na Aruba y nan ta practicamente yen. Nan tin dos luga cu nan ta haci uzo di dje. Tin na Imsan y tin na hospital y nan ta traha hunto. Nefrologonan tin un organisacion unda cu nan ta reuni tur siman y palabra cuanto luga mas nan tin habri. Awor aki Imsan ta yen. Eynan casi no por pone mas pashent. Na hospital, ainda tin algun luga, pero esey tambe ta yenando. Awor aki ta bezig pa mira si por bay expande. Tin plan pa vang op. A pensa riba strategianan cu por traha hunto. Na e momentonan aki nan tin plannan A, B y C. Pero ta serio cu tin asina hopi pashent di dialyse cu ta bin acerca. E crecemento cu tin na Aruba, por mira esaki bek na America, y tambe otro paisnan. Aruba ta den e top cinco cu tin pashentnan nobo di dialyse pa aña y toch ta basta halto y ta preocupante.
Ayudo na e hendenan
Nan ta trahando oranan extra. Pero ta pensando riba otro strategianan. Pesey a bin cu e parti di expansion, mas luga y mas stoel, mas personal, por ehempel. Ta hopi dificil pa yega na personal specialisa den dialyse. No ta tur caminda bo ta haya. Pesey ta bin cu un curso di specialisacion pa personal. E oranan di e tratamento, ta wordo parti e ora pa por keda den margen, segun e nefrologo.
Dialyse
Ora bo mester dialysa via sanger, bo ta bay tres biaha pa siman hospital, of e clinica di dialyse. Eynan e sanger ta wordo haci limpi. E ta dura 4 ora, tres biaha pa siman. Pero si bo tin demasiado vocht, de bes en cuando bo tin cu haci’e cuater biaha. Si ta haci’e via barica, e ora e pashent ta haya un mashin na cas. E ora e pashent ta drumi y e barica ta wordo haci limpi. Bo mes ta laga los y bo por cana normal. Tur dia e ta sosode pero na cas. Personanan hoben cu ta studia, ta haci’e nan mes via barica, unda cu nan ta dialysa nan mes, despues nan ta bay scol of traha. E ta un peritoniaal dialyse cu ta bezig ta expande na Aruba.
Hendenan mas bieu cu tin un otro tipo di estilo di bida, tambe por haci esaki, cu nan no mester yega hospital. Nan por dialysa nan mes den nan propio ambiente.
