DIMAS ta monitor semanalmente nan terminonan di tratamento pa wak si ta cumpli cu e termino cu nan a stipula pa nan mes cu nan lo keda cla pa peticionnan pa permiso, pero nan no ta riba un 100% cu nan lo logra, pero si ta yegando na un 80% na e cantidad di peticionnan cu a stipula pa nan mes.
Esey ta nifica, segun directora di DIMAS, Kathy Paskel, ainda no ta logra e 20%. Pa e caso specifico di e coach di deporte, tabata un fayo tecnico y a wordo adresa y soluciona. E persona a haya su permiso caba mientras tanto.
Cambio
Minister Andin Bikker a anuncia dos siman pasa e cambio di maneho. Esaki ta drenta na vigor cuminsando dia 1 di November. Tin diferente cambio cu a propone, diferente parti di e maneho cu a wordo ahusta y tur esakinan a verwerk caba den loke ta yama un toelatingshandboek, cual ta bay load siguientemente pa tur hende tuma nota di nan.
Den liñanan grandi tin cambio riba maneho di permisonan pa tempo indefini. Tambe tabata tin cambio riba parti di permisonan pa personal domestico. Cambio den maneho di con ta atende cu reunificacion familiar.
Riba diferente topico a touch parti di inversionista por ehempel, kennismigranten cu kier stimula pa bin Aruba. No solamente minister di husticia, pero den coordinacion di otro ministernan, manera labor y economia, a haci proposicion pa haci cambio di maneho, cual lo drenta na vigor dia 1 di November.
Migrantenan cu tin yiunan naci na Aruba
Tabata tin un migrante cu a anuncia cu e tin yiu cu a nace na Aruba y esey ta dun’e derecho pa e haya su permiso como su mama pa keda na Aruba, pasobra e ta stranhero.
Riba esaki, Kathy Paskel, directora di DIMAS a splica cu tin diferente parti di maneho pa specificamente e caso aki, den caso cu tin un mayor cu tin e potestad riba un mucha cu ta Hulandes naci na Aruba, un Arubiano, e persona aki por aplica pa bin na remarca pa un permiso pa por provee den e alimentacion di e yiu Arubiano aki cu e tin.
Den prome peticion e tin cu cumpli tambe cu rekisitonan y si e no cumpli, e permiso ey lo wordo nenga. Pero ta un permiso cu ta wordo duna a base anual y e permiso ey ta duna e persona na momento cu e wordo concedi, un autorisacion pa traha, den cua sector cu ta y no tin limitacion eynan. Anualmente e tin cu aplica y cumpli cu e rekisitonan.
E persona no mester ta casa cu e persona, pero si yiu. Esey ta un di e scenarionan. Tin un otro manera cu por hay’e, ta cu si tabata casa inicialmente cu un persona local y for di matrimonio a nace yiunan y e yiunan ta Hulandes, e matrimonio no a perdura, pa motibo di sea morto of di divorcio of separacion. E ora eynan, si tin yiunan cu e persona ey tin potestad riba dje, na momento cu e union ey a finalisa, y e tin responsabilidad pa e mucha, e ora lo percura riba peticion pa dun’e un permiso anual.
