E atleta elite den e deporte di bowling, Kamilah Dammers den su posicion como miembro di e Comision di Atleta a bishita Lausanne, Suiza unda e la atende un forum pa atleta internacional rond mundo. Kamilah ta resumi e meta di su biahe y e importancia esaki tin p’e atletanan rond mundo mirando e topiconan cu a trata.
Riba e prome dia, e miembronan di Comision di Atleta di Comite Olimpico Internacional a duna un splicacion amplio di con COI ta genera placa y tambe con 90% di e placa aki ta bay bek den varios programa pa prepara atleta, den e Weganan y den desaroyo di deporte mundialmente.
A enfatisa cu Comite Olimpico Internacional como tambe Panam Sports tin fondo anual destina n’e comision di atleta y ta haci un suplica na tur comision di atleta pa haci bon uzo di e placa aki.
Tambe a enfatisa riba e programa “Athlete 365” cu ta un recurso grandi pa nos atletanan durante, pero tambe despues di nan bida di atleta. Athlete 365 ta un plataforma gratis cu tin varios curso cu atleta por tuma pa mehora nan conocemento riba varios area.
Varios atleta Olimpico a splica di e hermentnan cu tin disponibel p’asina prepara bo mes p’e bida “despues di deporte”. Varios di nan a splica tambe con nan a uza esaki den nan deporte y nan network pa cuminsa cu nan mesun fundacion of negoshi. Mas cu claro e atletanan a pone enfasis riba e parti di “duna bek na comunidad”.
Riba e di dos dia a enfatisa hopi riba e concepto di “Safe Sport” cu mundialmente ta un topico hopi importante. E atletanan Olimpico cu a pasa den un of otro forma di abuso a conta nan storia y splica pakico ta hopi importante pa detecta e problemanan aki trempan.
Tambe, un panel fuerta di e atletanan Olimpico Pau Gasol, Lindsey Vonn y Alysson Felix a refleha riba nan experiencianan durante e Weganan Olimpico y splica pakico e eventonan Olimpico ta un di e miho momentonan di nan bida.
Tambe, un miembro di organisacion di Gangwon (Youth) 2024, Paris 2024, Milano-Cortina 2026 y Los Angeles 2028 a splica riba e preparacion di e weganan Olimpico y kico tur por spera mirando cu semper ta buscando manera pa mehora y innova e weganan. E dia a caba cu un sesion di 2 ora caminda por a haci pregunta directo na presidente di Comite Olimpico Internacional, Mr. Thomas Bach.
Por lo general, un super bon experiencia cu hopi miho conocemento di tur e hermentnan cu por ofrece na nos atletanan y tambe un momento di inspiracion scuchando kico tur e comision di atleta rond di mundo ta haci p’e atletanan.
