Hunto cu su kerido Tata, Gregory Wouters, Kailen a pasa dos siman largo den ful preparacion prome na Hulanda y despues na Francia mes. Asina ey e por a competi den e miho forma posibel den e Mundial di Bike Cross na Nantes, Francia.
Claro un experiencia unico pa e hobencito Wouters mirando cu ta su prome participacion na un mundial di BMX riba un pista profesional pa no papia mes di e publico grandisimo presente, cu a trece un presion enorme cu ne. Kailen a sa na maneha tur esaki super y esaki a paga cu un bunita final y un puesto 5 di mundo den e Boys 8. Kailen su famia semper ta apoy’e grandemente, su tata, mama Marellys y demas famia y sin lubida e coachnan na Aruba y Merca y demas compañero di Rough Riders.
Kailen a cera un bunita capitulo cu apenas a cuminsa na Nantes, pero sigur tin mas na caminda. Mas cu claro nos kier duna honor tambe na tur coredo di BMX cu de pasado tambe a bay World Championship cu algun logrando e final y premio manera Jobert Reyes, Zaithyel Soekandar, Bryan Elisabeth, Aschwin Dabian, Ischwar Martin, Random Koolman, Shanayah Howell y Valerie Simon.
