Diasabra anochi polis a presenta na Dominicanessestraat 17 p’un problema di huur cu supuesto agresion. Ey ta caminda cu un huurdo a acusa doño di apartamento di agresion. E huurdo a bisa polis cu e debe tres luna di huur y e doño di apartamento a bin cobr’e den mal forma.
Polis a detene e doño di apartamento y a cer’e pa cuater ora. E anochi ey, e huurdo a menciona cu e no tin forma pa pag’e huur. E no tin un trabou fiho y ta biba cu su yiu cu ainda ta bay scol. A hasta purba di yega na areglo pa paga 200 florin pa luna.
Dialuna, e otro partido a vocifera su preocupacion. Justo Suarez Torres ta fungi como e doñ’i compleho. E mes ta huur e edificio y a repartie den varios camber kende e ta huur cu diferente persona. Torres a inverti basta placa den e edificio pa por a haya hende pa huur camber. Pa algun tempo caba e tin problema cu e huurdonan, kende no ta cumpli cu nan paga mensual. Tin cu debe 9 luna, otro 8 y un hasta debe 12 luna.
E señora cu a denunci’e no ta deb’e tres luna sino nuebe luna, segun Torres. E ta desmenti rotundamente di a pone man riba e huurdo. Berdad el a confront’e, pero no a dal e. Torres no por mas cu e situacion mirando cu e huurdo ta uza coriente, awa y ta bin cu mas hende den cas, pero no ta cumpli cu pago. Pronto Justo Suarez Torres lo entrega e edificio bek mirando cu no por sigui biba y haci negoshi.
