Na prome lugar mi kier a pidi disculpa na pueblo y media pa ocupa un espacio y kita mi tempo y kisas pueblo su tempo tambe, na un parlamentario cu danki na AVP awe e tin un asiento den parlamento di Aruba, y cu diripiente a haya un flecha di amor den su curason di Partido MEP.
Nos ta papiando di un persona cu a yega cas di AVP, ricibi manera un famia y ruman pa Lider di AVP Mike Eman cu a dun’e tur confiansa di mundo pa por cuminsa su carera den AVP. Nos sigur mester respeta cada persona cu un dia kier cambia di opinion, pasobra nos como hende tin tur derecho pa hasi esey.
AVP manera cualkier otro partido politico na Aruba, tabata tin candidato cu a bin y bai, cu ta respeta nan derecho di scoge otro rumbo.
Tambe AVP a sa di ricibi cu brasanan habri candidatonan di otro partido cu a uni nan mes na e famia di AVP, y cu awe ta pilarnan di Partido AVP. No mester tin problema cu un hende por scoge su mesun rumbo y bai segun su pensamento. Esey ta un derecho fundamental di cada un di nos. Pero loke nos no mag di lubida den e caso aki, cu e Parlamentario independiente aki a sali for di AVP, no pasobra AVP awe segun su persona ta un partido corupto. Pero pa motibo di diferencia di opinion cu ing. Mike de Meza, y na unda e tabata kier un disculpa cu te awe ningun hende por a compronde esaki.
Esey tabata su motibo, segun su propio palabranan, di a sali for di partido AVP. Awo diripiente su motibonan inicial ta cambia den palabranan estilo MEP su ideologia cu mas bo gaña y mas bo ripiti un mentira, e mentira por bira realidad. Manera por ehempel e mentira di “Mega Debe.”
Tin un dicho ta bisa, cu papia malo di otro y sigur di esun cu a trata bo bon, ta bisa mas di bo mes cu di otro. Lider di Partido Mike Eman, y AVP su enfoke ta keda den bin cu plan y solucionan p’e pais aki. Cu nos pueblo pasando den situacion dificil pa biba y sobrebibi tur dia.Nos pueblo cu no ta pasando den su miho momentonan y tur dia ta lucha con pa sigui biba e siguiente dia. Un pueblo asota pa medida ,unda mester inventa y mester kisas pidi ayudo di amigo y famianan, haci prestamo, keda sin paga un debe un luna y pag’e otro luna pa asina por paga costonan halto di inflashon. Paga tarifanan halto di coriente y awa ,mester cumpli cu pago di number di auto prome cu fin di luna aki. Cumpli cu airco geld y schoolgeld, na unda varios mayor ta hayando carta den e dianan aki pa falta di incumplimento di pago di schoolgeld di 2023 cu nan no por paga ainda, bisando mayornan pa cumpli cu pago,si no e mucha no por participa na actividadnan Carnavalesco di scol.
Esaki ta e Aruba di awe cu nos parlamentario independiente cu a vota pro pa un presupuesto cu no tin ningun solucion y alivio p’e pueblo aki. Y el a vota pasobra el a enamora awo di Partido MEP. Un parlamentario independiente di a bisa cu e lo bin cu un politica nobo, pero cu te awe no a presenta un solo idea con pa soluciona problemanan di nos pais.
Un parlamentario independiente cu a bisa di ta integro y cu ta odia corupcion y cu awe tin un salario halto danki na e Partido cu a pone ariba su lista,e mesun partido cu awe e ta jama pa corupto, pero ta keda cobra e salario si tur luna. Pa mas informacion di e parlamentario independiente aki, mi ta sugeri pueblo di Aruba bishita e pagina di Facebook di AVP, y lo mira e candidato number 5 di AVP, su publicacionnan di algun tempo atras hunto cu relatonan politico ariba su amor grandi awo cu ta Partido MEP.
Manera un dicho na Spaño ta bisa.” Cada loco con su cuento’. Pero AVP si lo keda enfoka awo y semper pa bin cu ideanan y solucionnan pa nos pueblo por tin un bida miho y digno, manera AVP ta bin ta hasi caba, y cu ta hasta hayando atencion di Hulanda. Nan ta brasando e ideanan y solucionnan cu nos lider Mike Eman y AVP a presenta na Hulanda.
Aruba sigur no tin tempo mas pa perde cu politiconan manera e parlamentario independiente aki,vcu ta manera un pareha cu a divorcia y cu a haya un amor y pareha nobo,pero cu no por lubida su prome amor.
