Nos ta na final di otro aña escolar. Resultado di e examenklasnan ta aden y un di e scolnan cu diahuebs a duna resultado tabata Juliana School.
Paula Croes, directora di Juliana School, cu hopi orguyo a anuncia cu nan scol a logra 97% di graduado pa aña escolar 2022-2024. Esaki ta pa prome biaha cu den su 28 aña cu e tin n’e scol, cu nan ta logra un porcentahe asina halto den un prome ronda. Nan tabata tin un total di 31 alumno cu a bay examen, di cual un so no a haal e. Pero lastimamente, e no tin chens di slaag mas. Asina tambe ta anuncia cu nan lo keda cu e porcentahe actual.
Pa loke ta e aña escolar, e directora a bisa cu tur aña tin su retonan cu ne. Hopi biaha e alumnonan cu yega examenklas kier sa cu nan ta cla y cu no mester haci mucho mas pa por logra nan diploma. Tin hopi pushamento, hopi zundramento, pero na final, tur e pushamento, tur e zundramento no tabata envano, ya cu a logra su meta: un porcentahe halto di graduado.
Croes, na final tabata tin un mensahe pa e muchanan cu ta bay di derde pa vierde klas: pa no give-up, pa keda pusha. Vierde klas no ta esun mas moeilijk, pero si tin hopi cos di haci. Cuminsa trempan, dedica tempo na estudio y na final e alumno lo logra tur loke el a propone su mes.
El a desea tur e graduadonan hopi exito den nan reto nobo y pa sigui pusha padilanti! Un pabien special a bay pa Frederick Lobbrecht cu ta e miho graduado cu 7 materia y 62 punto en total. Algo peculiar ta cu e hoben aki a logra slaag cu 10 pa Scheikunde, sigur cu no ta facil! Hopi pabien!
