Ta un placer di por anuncia oficialmente e lansamento di un cancion nobo pa tur temporada cu tematica Gospel den ritmo di wals, cu un mensahe di speransa y aliento pa Aruba, interpreta magistralmente pa e hoben ganado di Poder di Hubentud 2021 di Asociacion Trabao Hubentud Aruba (ATHA) categoria hoben, esta Jorzinho Schlipken Croes cu a pesar di su corto edad e tin un trayectorio basta largo como musico y cantante.
Di chikito a sa di participa den festivalnan cultural manera Dande y un canto pa nos Himno y Bandera cantando diferente tema di diferente compositor di Aruba.
Banda di esaki, Jorzinho ta forma parti for di su di 10 aña den Tipico Hoben y Talentoso pasando Dande di cas pa cas, como musico tocando su wiri na diferente negoshi y cas di famia treciendo e mensahe bunita di bendicion y speransa di un aña nobo.
Jorzinho ta un hoben cu ta sumamente activo for di chikito caminda e la sa di canta den coro di Misa Hubenil y hasta adulto, na unda e por a amplia su conocemento tambe den diferente genero di musica cu ta parti religioso.
Como mucha, den temporada di pasco, a sa di lansa diferente tema di pasco cu a sa di zona na diferente radio local logrando alcansa di forma parti den diferente top di Musica di Pasco y Fin di Aña brindando na su persona e oportunidadnan di presenta na diferente actividad social y show di pasco.
Su pasion pa musica desde chikito a pone cu e la bay na diferente les priva di musica como canto, blokfluit, piano, percusion pa sigui desaroya su habilidadnan musical.
Cada biaha e ta den continuo desaroyo pa perfeciona su canto y dominio di su instrumentnan cu e ta toca y domina.
Actualmente tambe e ta formando parti di un banda di hobennan talentoso como drummer y conhuntamente cu e hobenan aki, nan ta creando nan propio temanan den otro genero.
Jorzinho como hoben ta practica tambe como percusionista (conga) den un ensemble cu enfoke Latino Caribeño y como drummer e ta practica cu un otro grupo di hobenan talentoso cu ta mas enfoka riba musica jazz, soul y funk.
Jorzinho su pasion ta musica y di e forma aki su interes pa diferente genero ta bira mas amplio.
A pesar di esaki y e estudio di musica cu e ta ricibi cu ta haci e experiencia musical uno interesante, Jorzinho no por laga loke ta di nos Tipico di Aruba un banda y ta sigui carga esaki den su repertorio como musico tocando su wiri participando den actonan cultural of cantando canticanan den su Idioma Papiamento manera e Gospel cu awe nos ta lasa oficialmente pa plama rond di Aruba y henter Caribe, e mensahe di paz, amor, union y hermandad den un bachi di wals cu’n sabor crioyo di nos ritmonan local.
Jorzinho ta un hoben cu caracter trankilo y su bos ta uno hopi suave y e pensamento a bin dilanti pa haci e realisacion aki, mirando bek e delaster acontecemento cu mundialmente nos ta pasando aden, den e temponan dificil aki y Jorzinho su vision ta pa aparta cu su musica y talento, no solamente na entrenamento, si no pa e por expresa libremente loke ta biba den su curason y su reflexion cu nos comunidad y e ta un manera positivo pa trece mensahenan cu lo brinda aliento y speransa pa nos hendenan y specialmente nos hubentud cu tambe nan mes por haya inspiracion y bin cu e ideanan pa acerca, conecta y pone tambe den nan curason y na prome luga, loke ta di Dios.
E gospel “Ban cende un bela” ta composita pa e conocido, carismatico y inspirativo Jhon Freddy Tobon Montoya cu a inspira spiritualmente den e tema aki cu tin un enfoke riba atencion, speransa y paz interno cu tanto nos Aruba mester di dje y cu a ser magistralmente aregla pa e maestro Raul Piar cu a logra graba e produccion aki den forma live den Solid Sound Recording Studio.
E video a wordo filma, edita y produci profesionalmente pa Arial Eyez di Dani Cruz.
Di parti Jorzinho Schlipken Croes, kier a manda un palabra especial di gradicimento na tur cu a forma parti participativo y protagonico di su mas reciente videoclip aki, pa por logra yega na un produccion di calidad asina bunita dedica pa nos dushi Aruba.
Masha danki na tur Radio-Emisora y prensa local pa duna balor na nos hobennan y pa impulsanan grandemente cu nan promocion den nan carera musical.
Nos ta spera cu e mensahe aki por yega directo na tur hogar di Aruba y den cada curason di tur su habitantenan, pa asina aki den conhunto por sigui aporta na paz cu tanto nos mester y ta anhela.
Y finalmente ta gradeci specialmente na Departamento di Cultura Aruba cu a aporta y colabora cu e proyecto bunita aki y na tur cu di un of otro manera nan a sa di contribui grandemente cu e realisacion di un producto asina bendiciona.
