“Nos ta den un parti bunita aki di Chile, unda cu nos a cuminsa cu nos reunionnan cu diferente obhetivo”, tabata palabra di Jo-Anne Meaux-Arends, Aviation Business Development Executive na Aruba Airport Authority (AAA) N.V. Ta varios ehecutivo di AAA y Aruba Tourism Authority (ATA) tabata presente na Chile pa atende cu varios reunion. Diaranson ultimo nan a reuni cu LATAM Airlines.
LATAM Airlines tin un storia masha bunita cu Aruba. Jo-Anne Meaux-Arends a expresa cu tin varios aerolinea cu ta cerca di su curason mirando cu nan tin un historia pa conta cu e destinacion. Algo cu Meaux-Arends a siña den e mundo di aviacion ta cu bo mester tin pasenshi. E storia di LATAM a cuminsa dies aña pasa, e tempo ey e tabata uza e nomber LAN Airlines.
“Mi ta corda ora cu nos a yega bek Aruba despues di a reuni cu LAN Airlines na Colombia. Nan a bisa nos cu nan ta cla pa cuminsa Aruba, pero lo cuminsa 3’or di marduga”, asina Jo-Anne Meaux-Arends a conta. E tempo ey mester a papia cu tur hende mirando cu no ta comun pa ricibi un vuelo 3:00 am. Sinembargo, nan tabata consciente cu t’e momento ey e storia di e aerolinea lo cuminsa. E storia caminda LAN lo cera conoci cu nos destinacion. Nan a informa cua avion nan tabatin disponibel y cua tabata e slot cu nan tabatin habri. Asina ey e storia a cuminsa, caminda nan a cuminsa cu tres vuelo pa siman for di Colombia.
Despues di un tempo, debi na e modelo di LAN, e tempo ey e tabata fungi unicamente pa trece e trafico di Colombia pa Aruba. Caminda Aruba constantemente tabata bisa nan cu Aruba tin mester di e conexion. E punto fuerte pa Aruba tabata pa conecta Aruba cu Cono Sur, pues Peru, Chile y Brasil. Nan a opera un poco mas di un aña y despues di esey a stop e operacion. Aeropuerto di Aruba a keda den combersacion continuo pasobra tabatin interes den Lima, mirando cu e ta un hub cu ta duna bo oportunidad pa conecta cu Cono Sur y e mercadonan grandi. Awo caba por conta cu e hub di Bogota y Panama, pues desde otro siman Aruba lo tin tres hub cu ta conecta cu Latino America.
Si enfoca riba e region di Latino America por mira cu LATAM ta hopi grandi. Di e 25 miyon stoel di capacidad cu tin den e region di Latino America, LATAM tin 30% di dje. Avianca ta na di dos luga cu 12% y Azul Airlines di Brasil cu 12% tambe. Ora midi e forsa di e aerolineanan, LATAM ta un di esunnan di mas grandi di Latino America.
Aña pasa Aeropuerto di Aruba a informa cu nan tabatin interes riba un otro aerolinea, hopi biaha ta puntra si tin mercado suficiente y e contesta semper ta “Si!”. Awo un bes mas por demostra cu tin e mercado pa Aruba mirando cu lo conta cu tres aerolinea cu lo conecta Aruba cu Latino America.
E intension ta pa sigui diversifica den Latino America. Aeropuerto di Aruba su strategia ta pa conecta pasahero directo mirando cu hopi biaha e pasahero no kier pasa e hub y sigui bay. Den e caso aki Lima, Peru, lo ofrece conexion pa diferente otro pais.
For di e cifranan ricibi por tuma nota cu e mercado ta responde. Por lo menos 35% di e pasaheronan cu a book caba ta bin for di Peru, 25% di Chile, 25% di Argentina y un tambe por mira un porcentahe poco mas chikito di Brasil. No tin duda cu Aeropuerto di Aruba lo sigui explora pa e mercado non-stop. “Pa nos e non-stop ta e producto y servicio perfecto cu kier ofrece e turista”, asina Jo-Anne Meaux-Arends a duna di conoce. Den e caso aki pa un tempo caba AAA ta den combersacion cu otro aerolineanan cu ta basa na Chile y kisas aki dos aña lo por tin un vuelo directo for di Chile.
Aña 2023 tabata un aña hopi grandi pa AAA, e tabata un aña caminda por a mira un recuperacion fuerte no unicamente den pasahero sino tambe a enfoca riba diversificacion di e mercado. Sin duda, Lima ta un di e desticionnan cu a enfoca riba dje y awo ta bira realidad. LATAM ta bira e di 26 aerolinea cu ta opera na Aeropuerto di Aruba. Si conta cu e aerolineanan cargo, cual ta tres, e ora ta bira 29 aerolinea cu ta ofrece servicio na aeropuerto. Awo esaki ta e di 45 vuelo directo for di aeropuerto.
Pa loke ta crecemento di pasahero, Aeropuerto di Aruba lo cera aña 2023 cu 8% mas cu aña 2019. Pa aña 2024 lo tin algun ruta hopi importante. E aña aki a mira un total di 5 aerolinea cu tabata hopi importante. A inicia e aña cu British Airways for di London, Wingo a introduci Cali, recien tin Lima y tambe lo conta cu Punta Cana. Punta Cana ta un destinacion di cual e localnan tin hopi interes den dje, hopi hende cu ta hunga golf ta interesa den e destinacion. Tambe por a mira cu Spirit a agrega vuelo adicional.
Na momento cu compara Aruba cu e demas destinacionnan den Caribe, por mira cu LATAM a anuncia un cantidad di 11 vuelo nobo den netwerk y Aruba tabata un di e diesunnan menciona. Sigur, ora cu mira Aruba riba e mesun lista cu London, Johannesburg y Melbourne, ta algo pa ta orguyoso si dje.
Pa otro aña lo sigui combersacion cu otro aerolineanan. Brasil ta keda un mercado cu lo sigui explora, tin combersacion andando cu varios aerolinea caba. Aruba ta un niche market, door cu e ta mas chikito y high end product compara cu Punta Cana y Mexico. Hopi biaha AAA ta haya oferta for di diferente aerolinea sinembargo pa AAA ta importante pa haci un scan riba e profile di e aerolinea y garantisa cu e ta un match pa e destinacion.
Ta bon pa enfatisa cu LATAM ta bira e di 26 aerolinea cu ta bula pa y for di Aruba. Si inclui carga, e cantidad ta yega te na 29 aerolinea. E vuelo Lima-Aruba ta e di #45 vuelo non-stop (4 ora) di Aruba. LATAM su destinacion #1 cu e ta conecta for di Lima ta Cusco.
LATAM, den e region di Latino America, ta e aerolinea cu ta domina e mercado cu 30% di “seat capacity”, sigui pa Avianca cu 12% y Azul 12%. Copa tin 5%. E rol di aeropuerto ta pa conecta Aruba cu mundo y fungi como un instrumento den e sistema ecologico di turismo.
Desde otro siman Aruba lo conta cu tres hub den Latino America; BOG, PTY y LIMA, considera como un long haul hub unda ta conecta Aruba cu e Cono Sur, esta Chile, Argentina y Brazil – Sao Paulo, Rio y Belo Horizonte.
Pa loke ta Aeropuerto di Aruba mes, ta considera esaki un aña record! A crece den cantidad di pasaheronan cu un total di 8% compara cu aña 2019. Den caso di e mercado Latino Americano, a redobla e market share di 8% pa 16% y ta premira cu lo sigui aumenta.
Aña 2023 a cera cu cuater ruta nobo, cu ta London cu British Airways, Cali cu Wingo, Spirit a aumenta nan vuelonan considerablemente for di Fort Lauderdale, Lima cu LATAM y Punta Cana cu Sky High. Aña 2024 ta mustra di ta un otro aña grandi, den volumen di pasahero. Como Aeropuerto di Aruba, ta nan tarea pa sigui sondea oportunidad pa ofrece vuelo directo di Latino America, por ehempel Sao Paulo, Brasil y Chile den un futuro cercano.
