Despues di e schorsing di Rene Bernabela, durante e congreso, a scoge tres persona pa fungi como comision di supervision. E comision di supervision ta consisti di un presidente, vice-presidente y secretario. Pero e presidente di e comision ta esun cu a lanta calumnia contra e sindicalista.
Rene Bernabela, ex-presidente di sindicato TOPA, a splica ora a nombra e tres personanan aki como Raad van Toezicht, di e momento ey caba el a sinti un tipo di atake den su direccion. E no a preocupa, pasobra e ta haci su trabou manera mester ta, pero e preguntanan cu a bay den su direccion tabata manera tabatin algo contra di su persona. E persona cu a fungi como presidente di e tempo ey tabata Jayburtt Dijkhoff, kende ta e persona cu ta sali den defensa di pashent y tur anochi ta duna lectura.
Dijkhoff como presidente di supervision a acusa su persona sin uza e parti di hoor en wederhoor riba cierto acusacion cu practicamente no por a substancia di ningun sorto prueba cu tabata acusa Bernabela. Un di e cartanan a bay asina leu di ta acusa Bernabela a fix su mes pa locual e vergoeding cu e tabata haya.
Na Aruba tur hende sa den un organisacion un presidente no por fix su mes ningun sorto di vergoeding si no ta trata den un reunion di directiva. No ta excepcion den caso di sindicato TOPA. Bernabela su vergoeding a pasa prome den reunion di directiva, y eynan a aproba cu e presidente por a haya vergoeding. Tur dia e ta bay reunion y ta haci uzo di auto, uza paña y etc.
Comosifuera esey no tabata suficiente, durante e temporada di Dijkhoff y e compañeronan di comision di supervision cu tabata eligi durante congreso, segun Bernabela, statuto di sindicato TOPA ta bisa cu e miembronan di comision di supervision ta funciona dentro di un aña. Esaki ta basa riba articulo 24 ciso 2 di statuto di TOPA.
Durante henter e proceso unda a culp’e riba diferente acusacion, ningun dia a bin cu e pruebanan riba papel. E tempo ey, mirando cu e cos aki tabata bay den un direccion cu Bernabela ta haya cu e ta inhusto. A acus’e pa algo y no tabatin prueba. Na ningun momento a scuch’e. Esey a pone cu el a acerca bufete di abogado pa sinta y atende cu e acusacionnan falso y baho.
