Organisacion Pensionado Publico Arubano (OPPA) ta preocupa con e situacion p’e grandinan ta. Ta papia cu ta yuda e grandinan, ta central, pero no ta haya e trato mereci. Ta para subsidio di un instancia pa hende grandi cu mester di e cuido cu nan no ta haya na cas.
Ivo Valdes, presidente di OPPA, a indica cu awo tin un departamento cu ta e Telefon pa Adulto Mayor. E adulto mayor ta yama e number y bisa su preocupacion. Pero e pregunta cu ta bin dilanti ta con a yud’e, door di scuch’e? Asina ta yuda e grandi? Di otro banda ta stop subsidio di un instancia asina grandi pa malesa cronico. E hendenan cu ta den e instancia aki ta pasobra nan no por haya e cuido na cas.
E instancia mester di placa pa duna e pashent un cuido di calidad. No por bin cu e struikel blokken pa stroba e instancia traha. Si ta bisa cu e grandi ta central, nan ta forma parti di e generacion di hende, e ora ta di ki forma ta trata nan. Segun Valdes, no ta respeta nan, no ta duna nan dignidad cu nan merece y ta bin cu tipo di exigencia aki.
Recientemente Valdes a tene un reunion cu Minister di Asunto di Grandi Ursell Arends, unda nan a trata diferente topico. Un di nan tabata e sociale vangnet. Segun Valdes, el a tende cu tabatin shen mil disponibel pa ayudo social, pero e placa a caba. E ta puntra di ki tempo ta papiando, algo di dies of bini aña pasa? E cantidad di hende grandi cu mester di ayudo a bira hopi mas grandi. Riba e presupuesto no por keda mantene e mesun suma. E ta lamenta cu na Aruba no ta produci lider. Pasobra lider tin vision pa futuro, pa generacion adelanta. Esey no tin aki, pasobra loke tin ta politico cu ta pensa solamente riba e cuater añanan cu nan ta den gobernacion. E ta haya cu no por sigui asina, no por sigui di e forma ey. E debe no a baha y cada bes tin mas debe. Tanten cu e debe ta halto, no ta resta placa p’e partinan social.
Pa mas lesa TREMPAN.COM
