Diadomingo durante dia Iron Order Motorcycle Club Aruba a tene su Back to School Ride. Esaki na beneficio di e muchanan cu tin mas mester, pa habri un aña escolar nobo na un manera sano y contento.
Jairo Dania, presidente e club, a comenta cu nan ta haciendo e charity ride aki tur aña, yama Back to School Ride. Aki a caminda cu e bikernan ta sali hunto y reuni cu e famia di biker na Aruba, pa hunto duna bek na comunidad.
Meta di e ride tabata pa recauda tiki fondo pa por yuda e muchanan cu ta den necesidad, sea cu material di scol of cuminda. Ta haci esaki por medio di varios instancia reconoci.
Dania a sigui splica cu e ride aki ta uno cu Iron Order a adopta y tin cuater aña ta haci esaki caba, cual ta sumamente exitoso.
Aña pasa a haci un “Backpack Drive”, ya pa tres aña, aunke e aña aki a bay cu un meta diferente, ya cu tin mas club ta haci esaki caba.
NO TA BAY PA CUANTO MIEMBRO
E actividad aki no ta bay pa cuanto miembro tin den e club, sino e totalidad di biker na Aruba, trece nan hunto, p’asina tin un evento hopi exitoso. Iron Order Motorcycle Club Aruba a demostra esaki pa cuater aña y e biaha aki no lo ta diferente.
FONDO RECAUDA
Aña pasa so nan a recauda 345 tas y entrega na mucha. No ta solamente tas bashi, pero cu contenido, esta e necesidadnan basico cu tur mucha tin mester pa por cuminsa scol cu ne.
DESEO
Scol a cuminsa caba. Sinembargo e necesidad di e famianan ta hopi mas grandi cu e wowo di pueblo ta mira.
Iron Order Motorcycle Club Aruba, a bin ta complementa esaki p’e famianan cu tin e un tiki mas dificil.
A LOGRA META
Durante noticiero Enfoke, Iron Order Motorcycle Club a gradici un y tur, bikers y non-bikers cu a sa di duna nan aporte, p’asina logra nan meta. Dania a comenta cu na 2019 nan a recauda 60 tas pa mucha di scol cu tur e materialnan necesario pa un mucha por cuminsa scol.
Na 2020 a hisa esaki cu mas di 100 tas. Mientras cu ta mira e trend ta haya publicidad, e cantidad tambe ta crece.
Aña pasa a cera e evento yudando cu 345 mucha cu tas pa bay scol. sinembargo e aña aki a bisa pa haci algo diferente. Tin mas organisacion ta haci mesun cos. A dicidi e ora pa recauda fondo pa por yuda e muchanan cu tin e dificil.
Ta net n’e momentonan aki ta ripara cu ainda, aunke scol a cuminsa, tin famia ta struggle pa paga un schoolgeld, pa paga un aircogeld. Tin mucha cu ainda no tin cuminda pa come na scol. E club a haci e fundraising y un biaha mas a recauda un suma di 4311.75 door di e bikernan y negoshi cu tabata riba nan ruta.
Ta p’esey mes ta gradici tur cu a yuda manera Roti spot, Urataca Center, Coco Loco Bar, gerencia di dicho negoshinan cu a contribui grandemente cu e club pa un causa asina bunita.
ACTIVO DEN COMUNIDAD DESDE 2015
For di aña 2015 Iron Order Motorcycle Club ta estableci na Aruba y ta forma parti di un asociacion internacional di biker. No ta solamente nan ta core brommer. Nan ta reuni ora di bon, pero tambe ora cu pueblo tin mester di nan, nan ta reuni, asina duna bek na pueblo.
