Durante algun ora largo, e dentista Venezolana cu ta practica medicina oral den forma ilegal na Aruba, mester a duna cuenta durante un proceso di interogacion riguroso. Recherchenan a pone e hechonan riba mesa, a repasa e pruebanan contra dje y a splic’e con leynan local ta funciona aki banda. Mescos cu un dentista di Aruba no por practica na Venezuela sin permiso, aki ta mesun cos!
Ayera diabierna pa 6:30pm, polis hunto cu inspectornan di Inspectie Volksgezondheid Aruba (IVA) a tene un “inval” na Hubadastraat 11-D, na un cas situa na Ponton. Ey a atende cu un dentista trahando ilegal, pues sin permiso di estadia, di trabou y pio di DVG cu ta permiti pa por practica medicina oral riba nos isla. Autoridad a presenta e sospechonan na Ministerio Publico, pa cual Fiscal a duna ordo di detencion mesora.
Tin indicacion cu esaki no ta e unico caso di sea dokter of dentistanan Venezolano cu ta bin practica medicina den forma clandestino y sin permiso na Aruba. Den cas di hende y sin tene cuenta cu medidanan higienico, ta atende cu pashent, ta duna remedi cu nan mes ta trece den maleta, etc. Ta corda publico cu nan mes ta exponiendo nan salud dor di coopera cu e tipo di practicanan asina, djis pa por haya prijs barata. Na Spaño tin un dicho popular ta bisa “lo barato sale caro”.
