Gobierno di Aruba ta felicita presidente electo Joe Biden

“On behalf of the Government of Aruba, we would like to congratulate Joe Biden and Kamala Harris with their election victory after a close race. We are looking forward to continue the strong bond between our countries”, asina Minister di Turismo, Salubridad Publico y Deporte, Dangui Oduber, a skirbi un rato pasa riba su pagina di Facebook. Di e forma aki gobierno di Aruba ta saluda y felicita e presidente electo nobo di Merca.

Mester menciona cu e mesun texto di felicitacion di Minister di Turismo, tambe ta riba e pagina di Minister Presidente mr. Evelyn Wever-Croes. Merca ta un aliado importante pa Reino Hulandes. Te ainda minister-president Mark Rutte mes no a felicita Joe Biden ainda riba su pagina di Facebook.

E relacion di Merca y Reino Hulandes ta data desde e revolucion Mericano, cu Hulanda a sostene e tempo aya. Merca a establece relacionnan diplomatico cu Reino Hulandes desde aña 1782. Ta trata aki di un di e relacionnan diplomatico mas bieu di gobierno di Merca. Bon pa informa cu Hulanda ta un di e inversionistanan di mas grandi na Merca, sosteniendo creacion di como 700 mil cupo di trabou y ta di 8 importado mas grandi di productonan Mericano. Merca di otro banda ta e inversionista di mas grandi na Hulanda. Dos aña pasa a conta e inversionnan na 711 biyon dollar Mericano.

Hulanda ta participa den e programa “Visa Waiver” di Gobierno Mericano, cu ta duna tur ciudadano di Reino Hulandes derecho pa por drenta Merca pa haci negoshi of pa turismo, te cu un maximo di 90 dia sin cu mester pidi un Visa Mericano. Masha poco pais na mundo tin e bentaha aki cu Merca.