Dialuna anochi laat algo prome cu 9:00 pm, Fito Croes a sali cu ambos man na boei for di Landsrecherche. Su abogado Zuhaila Arendsz-Marchena a sali un rato prome sin duna declaracion na prensa. Fito Croes ta bira e di nuebe sospechoso den e caso Flamingo. Mescos cu Aisha Esser cu ta deteni desde dialuna 1 di maart; tambe ta sospecha Fito Croes pa soborno, pues ‘omkoping’.
Interogacion di Fito Croes a dura henter dia, na su cas mainta trempan a confisca cantidad di documento. Fito Croes no a bisa nada na salida di Landsrecherche. E sospechoso Aisha Esser a sali algo pasa di 6:00 di atardi. Esser a haci algun remarke chikito e.o. cu ainda e tin 200 pregunta mas pa contesta y cu ora e ta den libertad bek e lo duna un conferencia di prensa pa aclarea e situacion.
Ta premira cu e siman aki lo tin mas detencion den caso Flamingo
CASO FLAMINGO
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bao guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delito di corupcion y otro hecho castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche ordo na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
