Monumentenbureau ta e instancia gubernamental engarga cu e ordenansa di monumento, ta encarga cu tur asuntonan general di monumento, ta prepara y diseña y traha e descripcion pa destaho pa restauracion di monumento, ta supervisa y maneha restauracionnan, ta controla y duna permiso di monumento, ta encarga cu tur asuntonan tecnico di monumento, duna informacion y educa y ta e instituto di conocemento di monumento di Aruba. E departamento gubernamental aki ta ekipa cu e expertonan di monumento di Aruba.
Conforme e ordenansa di monumento, AB 1991 no GT 46, articulo 4, Minister di Cultura, Xiomara Ruiz-Maduro, a indica por medio di un decreto, pa un edificio bira un monumento proteha. Monumentenbureau ta e instancia di gobierno encarga pa ehecuta e proceso di proteccion. Director di Monumentenbureau, Yvonne Webb-Kock tin e mandato di e Minister di Cultura pa e.o. efectua e proteccion den su nomber. Den e proceso y conforme e ordenansa ta scucha Monumentenraad cu a duna aprobacion.
Proteccion
Noord 2 , conoci tambe come ‘Klooster” banda di Imeldahof ta un monumento proteha caba. E compleho ta consisti di un “Klooster y un Kapel“ y a wordo construi entre 1954 pa 1958. Zusters di Domicanessen a uza e Klooster y Kapel. Misa Catolico tabata duna hopi atencion na nos muchanan y Madre superior Imelda di Dominacassenzusters di Bethanië a bin Aruba na fin di aña 1951 pa prepara un instituto pa cuida y educa e muchanan. Madre superior Imelda y e zustersnan (Theresia Verwey, Lidwina van de Putten, Imelda Blom, Rosita Rens, Magdalena Knippenberg, Maria Carres y William van Leeuwen) a guia e construccion di e instituto cu a cuminsa riba 4 di januari 1954. E Klooster a keda cla na november 1958.
Riba initiativa di Fundacion Kapel Bethania, Monumentenbureau a prepara e decretonan ministerial pa agrega e interior di e Kapel y alabes clarifica e baloracion di e monumento proteha. A manda e decreto cu un carta oficial pa e doño(nan), usuario y pa e hypotheekkantoor di DLV y un notificacion cu lo publica den e Landscourant di Aruba. Despues di seis siman di a sali den e Landscourant, lo por inscribie den e Registro di Monumento. E criteria di seleccion pa indicacion pa bira un monumento protehi na Aruba den categoria A of categoria B ta stipula den un di capitulonan cu ta forma parti di e ‘Monumentenhandboek Aruba’. Conforme e “Monumentenhandboek Aruba”, Noord 2 ta clasifica como un monumento den categoria A. Den e “handboek” ta describi e reglanan cu mester mantene pa un monumento den categoria A.
Pa e interior di Noord 2 enfasis ta riba e elementonan den e Kapel y e elementonan cu awo ta wordo proteha ta encera e altar, bankinan y cashinan cu ta pega na vloer y muraya, estatuanan den kapel, tegelnan den e compleho, blafon, etc.
Monumentenbureau ta gradici Fundacion Kapel Bethania pa e cortesia di hopi portet y tambe comparti e informacion necesario. E vision di Monumentenbureau ta pa nos cuminsa rescata nos patrimonio pa despues restaura nan pa nan keda pa nos siguiente generacionnan.
