Tanten cu Eagle LNG no cuminsa opera y entrega gas natural, Aruba no lo conoce un reduccion den tarifa di awa y coriente. Ta algo cu director di WEB Aruba NV, ing. Alfredo Koolman, no por premira, ya cu e no sa con e desaroyo lo bay ta.
Door di un situacion geopolitico, prijs di azeta lo bay subi, mientras cu tres siman pasa e prijs a baha, prome cu e atake na Israel. Ta cuestion di sigui vigila y anticipa y move y cu hedging por haci esey. Tin 50% di tur azeta HFO cu WEB lo uza den aña 2024 gehedge caba, door di un bon sistema di vigila y e bon sistema di traha cu gerencia y e hunta di comisario tin den WEB cu ta vigila e prijs di azeta tur dia.
HEDGE TA ALGO BON
Segun Koolman, hedging ta garantisa cu por mantene e tarifanan p’e siguiente periodo y no ta haya cu e tarifa ta bay subi debi na dependencia, manera entre otro e impacto di e situacion na Medio Oriente riba prijs di azeta. Den pasado ora cu otro gobierno a hedge, a demonisa e practica aki. A hasta laga investiga e minister anterior pa mira si por tabatin corupcion cu hedging y a core campaña contra hedging. Awe por mira cu “hedge” diripiente a bira bon y MEP tambe ta hedge, haciendo lo contrario cu a priminti den campaña.
