Den entrevista cu 24ora, Dr. Joel Rajnherc, director di Instituto Medico San Nicolas (ImSan), a duna un splicacion integral di e motibo pakico actualmente e prome consulta cu un specialista di wowo por tin un retraso di te cu ocho luna. E topico a bin dilanti despues cu un lector di TREMPAN a comparti su caso caminda su casa a haya verwijsbrief for di luna di mei ultimo pa bay na un specialista di wowo, pero a keda informa cu probablemente pa e aña aki no lo haya cita mas, ya cu ta atendiendo e verwijsbriefnan cu a yega den luna di maart ainda.
Dr. Rajnherc a cuminsa na reconoce e retraso y admiti cu e situacion no ta uno nobo. E problema ta existi di basta tempo caba y, tur esunnan involucra ta buscando un solucion. Loke ta hacie pio ta, entre otro, e recorte den sector medico cu ta ocasion un falta di recurso financiero y como consecuencia falta di personal pa asisti e specialista di wowo, y tambe cu ta halando aden ainda e retraso ocasiona door di e pandemia.
ImSan su departamento di oftamologia (wowo) a cuminsa cu dos specialista pasobra esey ta e cantidad cu AZV y e manpowerplanning di e tempo ey a indica. Pa dr. Rajnherc esey tabata e prome fout. Asina mes, awendia, e instituto medico ta conta cu cinco specialista di wowo, mas e asistencia di un otro specialista priva na Dakota. E colaboracion den e ekipo aki ta optimal y te hasta InSam a expande su presencia na oficina di dr. Jacobs pa brinda mas servicio na e pashentnan pabou di brug. Pa loke ta trata operacion, mayoria ta sosode pariba na ImSan, cu algun excepcion na Dr. Horacio Oduber Hospital.
Sinembargo, e problema na Aruba ta uno multifactorial. E no ta solamente cu nos no tin suficiente dokter di wowo, pasobra pa e cantidad di pueblo cu nos tin, en realidad e ta relativamente basta hopi dokter di wowo. Hasta e investigacion cu ta haci y ta compara nos cu Hulanda, por ehempel, ta bisa cu nos tin dokter di wowo di mas. Personalmente, dr. Rajnherc no ta kere esey pasobra no por compara e situacion di Aruba directamente cu esun di Hulanda. E ta kere cu si tin luga pa mas, pero no solamente pa mas specialista. Tin mester di mas optometrista na servicio di AZV y tambe tin mester di mas aparato pa test wowo.
Pa e relato completo, lesa TREMPAN
