E Asociacion Internacional di Transporte Aereo (IATA) a baha su pronostico di trafico aereo pa aña 2020, reflehando un recuperacion mas debil di loke a anticipa, como e final tristo demostra den e temporada di biahe di zomer den e hemisferio aki. IATA awo ta spera cu e trafico di henter 2020 lo cay un 66% compara cu aña 2019. E calculacion anterior tabata di un caida di 63%.
E demanda di pasahero na augustus a spanta hende hopi, si compar’e cu e nivel normal, cu un caida di 75,3% di pasahero pa kilometer (RPK) compara cu augustus di 2019. El a mehora liheramente compara cu e contraccion anual di 79,5% na juli. E mercadonan nacional a sigui supera e mercadonan internacional den termino di recuperacion, aunke mayoria a keda substancialmente abao for di un aña pasa. E capacidad di augustus (kilometernan di asiento disponibel of ASK) a reduci den cu 63,8% compara cu e aña anterior y e factor di ocupacion a cay cu 27,2 punto riba un minimo historico di augustus di 58,5%.
Segun dato di vuelonan, recuperacion di servicio di pasaheronan aereo a para memey di augustus door di e regreso di e restriccionnan gubernamental pa e brotenan nobo di COVID-19 den varios mercado clave. Mientras cu a spera cu e caida den crecemento anual di RPKnan mundial lo ta modera na -55% na december, awo ta spera un mehoracion hopi mas lento cu e luna di december pronostica na un 68% menos compara cu un aña pasa!
“E desempeño desastroso di e trafico aereo di augustus ta e pio temporada di zomer di e industria. E recuperacion di e demanda internacional ta practicamente inexistente y e mercadonan interno di Australia y Hapon a experimenta un caida pisa door di e brotenan nobo y e restriccionnan di biahe. Algun luna pasa, a pensa cu un caida di e demanda di -63% den henter aña compara cu 2019 tabata e mas malo cu e por tabata. Pero, cu e periodo piek tristo di biahe di zomer tras di lomba, a revisa expectativanan riba un caida di -66%,” segun Alexandre de Juniac, Director General y CEO di IATA.
Mercadonan internacional di pasahero
E demanda internacional di pasahero na augustus a cay un 88,3% compara cu augustus di 2019, un mehoracion leve respecto e caida di 91,8% registra na juli. E capacidad a cay un 79,5% y e factor di ocupacion a cay 37,0 punto porcentual te cu 48,7%. E trafico di aerolineanan di Asia-Pacifico di augustus a cay 95,9% compara cu e mesun periodo di e aña anterior, apenas a move di un caida di 96,2% na juli y e contraccion mas pronuncia entre e regionnan. E capacidad a cay un 90,4% y e factor di carga a reduci 48,0 punto porcentual na 34,8%.
E aerolineanan Europeo den demanda na augustus a cay un 79,9% compara cu aña pasa, a mehora desde un caida di 87% na juli, ya cu a elimina e restriccion di biahe den e espacio Schengen. Sinembargo, dato di vuelonan mas reciente ta sugeri cu e tendencia a reaparece memey di un regreso di e blokeo y cuarentena den algun mercado. E capacidad a cay un 68,7% y e factor di ocupacion a reduci un 32,1 punto porcentual te cu 57,1%, cu tabata esun mas halto entre e regionnan.
E aerolineanan di Medio Oriente tabatin un caida di demanda di 92,3% na augustus, compara cu un caida di 93,3% na juli. E capacidad a colaps 81,9% y e factor di ocupacion a baha 47,1 punto porcentual na 35,3%.
E trafico di aerolineanan Norteamericano a cay un 92,4% na augustus, cu poco cambio compara cu e caida di 94,4% na juli. E capacidad a cay un 82,6% y e factor di ocupacion a cay 49,9 punto porcentual te cu 38,5%.
E aerolineanan Latinoamericano a registra un caida di demanda di 93,4% na augustus compara cu e mesun luna di aña pasa, frente un caida di 94,9% na juli. E capacidad a cay un 90,1% y e factor di ocupacion a cay 27,8 punto porcentual na 56,1%, e di dos mas halto entre e regionnan.
E trafico di aerolineanan Africano a cay un 90,1% na augustus, liheramente a mehora cu respecto na un caida di 94,6% na juli. E capacidad a contrae 78,4% y e factor di ocupacion a cay 41,0 punto porcentual na 34,6%, cu tabata esun mas abao entre e regionnan.
Mercado di pasaheronan nacional
E trafico interno a cay un 50,9% na augustus. Esaki tabata un mehoracion leve compara cu un caida di 56,9% na juli. E capacidad nacional a cay un 34,5% y e factor di ocupacion a reduci den 21,5 punto porcentual te cu 64,2%. Trafico di aerolineanan di Merca di augustus a baha un 69,3% compara cu augustus 2019, solamente un mehoracion lihero compara cu juli, ora cu e trafico a reduci un 71,5%. Un aumento di e brote y e cuarentenanan den e mercadonan nacional principal a contribui na un resultado decepcionante.
E aerolineanan Ruso a mira su trafico interno aumenta un 3.8% compara cu augustus 2019, e prome mercado pa nota un aumento anual desde e inicio di e pandemia. E caida di tarifanan hunto cu un crecemento di turismo interno tabata algun di e factornan principal pa contribui na e cambio positivo.
Conclusion
“Tradicionalmente, e entradanan genera durante e temporada aki di zomer den e hemisferio norte ta brinda e aerolineanan un corchon durante e temporadanan scars di herfst y winter. E aña aki, e aerolineanan no tin tal proteccion. Sin medidanan adicional di ayudo di gobierno y un reapertura di e fronteranan, miles di trabao den aerolineanan lo disparce. Pero no solamente e aerolineanan y e empleonan den e aerolineanan ta na riesgo. Na nivel mundial, decenas di miyones di trabao ta depende di aviacion. Si e fronteranan no bolbe habri, e salarionan di e personanan aki ta den peliger grave.
