Den cuadro di e 25 aniversario di Stichting Monumentenfonds Aruba(SMFA) e Fundacion a crea un serie di video caminda cu lo entrevista diferente persona cu di un forma of otro a contribui na e preservacion di un edificio monumental.
Cada luna, dia 25, lo tin un video nobo caminda cu e publico lo por haya ehempel di personanan of comerciante cu sea ta huur of uza un edificio di Monumentenfonds pero tambe iniciativanan priva pa restaura edificionan historico.
Entrante awe lo por wak e prome entrevista cu Mark Benson, propietario di Patio 15 cu ta conta un tiki di e proceso pa converti e bunita monumento na Weststraat 15 for di oficina pa un Bar, restaurant y espacio pa evento. Tambe e lo conta nos un tiki mas di e historia interesante di e Monumento aki cu a muda mas cu 20 aña pasa di su localidad original.
E meta principal di e serie aki no ta solamente pa informa y educa e publico tocante monumentonan di Aruba pero tambe pa inspira un y tur cu ta buscando un localidad ideal pa sea biba of un proyecto di negoshi nobo pa scoge pa re-uza un edificio historico y asina contribui na yuda preserva parti di Aruba su herencia cultural.
SMFA ta invita un y tur pa wak e serie aki riba nan pagina di Facebook Stichting Monumentenfonds Aruba y follow via nos Instragram @monumentsfundaruba pa mas entrevista tur luna.
Si un persona ta buscando e luga ideal pa su oficina of negoshi nobo of kisas un espacio diferente pa biba por semper tuma contacto cu Stichting Monumentenfonds Aruba y lo por yuda busca e monumento ideal y asina hunto sigui preserva e pasado pa futuro.
