“Bon noticia pa Aruba”, asina Minister demisionario di Salud Publico, Turismo y Deporte, Dangui Oduber, a anuncia un rato pasa riba su pagina di Facebook. E mandatario local ta contento pasobra e Secretario di estado di Volksgezondheid, Welzijn en Sport di Hulanda, esta Paul Blokuis, a bay di acuerdo cu e peticion cu Aruba a haci siman pasa dialuna pa manda mas personal pa yuda na Dr. Horacio E. Oduber Hospital.
Minister Dangui Oduber tabata orguyoso di anuncia cu lo bin 10 nurse pa ICU y 2 intensivista. E dos funcionnan aki ta scars na Aruba y ta hopi necesario den hospital, pa por maneha e di cuater ola di Covid cu a percura pa hopi contagio. Consecuentemente mester a interna hopi pashent, entre otro den e unidad di cuido intensivo ICU, unda net awo no tin suficiente man pa maneha tur pashent. Pa e motibo ey ta manda hende Colombia pa ricibi tratamento medico eynan.
“Un danki di curason na Secretario di estado Blokhuis pa cumpli cu nos peticion. Hunto nos lo sali for di e situacion fastioso aki”, segun minister Oduber a anuncia un rato pasa.
