Ta pa por lo menos a aña caba cu Aruba Food and Beverage Association (AFBA) ta busca un forma por medio di Gobierno di Aruba pa por logra stimula persona nan pa bin traha den e sector di Hotel Restaurant Cafe (HORECA). Riba nan mes a purba di tur forma pero no a logra. Miriam Dabian ta Chief Operating Officer di AFBA, el a vocifera su preocupacion inmenso riba e topico aki.
Nan ta sinti cu gobierno tin oido pa nan peticion pero nan kier mira mas resultado. E situacion ta yegando asina leu cu hasta dentro di poco nan lo por consider’e como algo alarmante. Ta trahando duro pa busca solucion. Ta hasta haci promocion pa mira ken kier traha, pasobra; trabou tin ta trahado mester.
A organisa diferente evento, entre nan e famoso Aruba Job Fair, caminda ta ofrece trabou na henter e pueblo di Aruba hasta hobennan cu a caba di studia tin oportunidad di trabou den horeca. Nan problema ta pa ricibi trahado Arubiano of cu ta biba na Aruba, via nan website semper ta publica vacatura pero casi nunca ta ricibi reaccion.
Esunnan cu kier traha sea no ta legal of tin problema cu permiso pa traha. Ey ta caminda cu nan ta na mesa cu gobierno. Tin cu bisa si cu tin un plan riba mesa pa legalisa tur persona cu a drenta Aruba di un forma legal y actualmente ta indocumenta riba nos isla, pa legalisa tur. Tur esaki p’e simpel echo cu e sector di horeca mester trahado y urgente.
Mirando e proceso asina largo pa tuma hende nobo na trabou ta pone cu nan tin cu lucha cu esunnan cu tin actualmente. Pa cual ta pone un extra presion riba nan y e ta bira na dado momento un stress pa nan tambe. Ta bayendo asina leu di duna conhunto cu OAA ta mandando esunnan cu kier traha algun curso special pa nan siña e trabou den combinacion cu e trahamento y tur esaki completamente paga p’e sector y hasta ricibi salario.
Cosnan a yega asina leu cu ya caba tin restaurant cu a cuminsa cera mas dia den siman pa reduci e presion cu nan tin actualmente riba e trahadonan. Ya ta reduciendo servicio mirando e scarsedad di personal cu tin actualmente. Ta spera cu pronto por mira un solucion sino tanto bal atrae mas turista na Aruba y no tin personal pa traha den e sector mas importante riba nos isla kende ta horeca.
