Caos total ta locual cu ta biba na e momento aki na Acapulco Mexico, unda cu Horcan Otis a sorprende tur hende durante ora di anochi. Ta trata di un horcan categoria 5 cu a suta e area turistico aki den tur su forsa.
Un scenario devastador ta locual por a mira durante henter anochi riba rednan social, di tanto recidente como turista cu tabata den centro di e horcan y cu a biba varios ora di angustia. Algun tabata subi imagen di con bentana, dak, mata y edificio completo tabata bin abou. Diferente hotel mester a busca manera pa rescata nan huespednan y scondenan den shelter como cu e horcan a ranca bay cu mita di e edificio/hotelnan.
A categorisa Horcan Otis como e horcan di mas fuerte den historia cu a asota e costa pacifico di Mexico. El a surpasa dobel su forsa, un poco prome cu e yega tera y no a duna espacio na ningun hende pa prepara pa locual tabata sin duda, un catastrofe.
E daña mas grandi tabata registra na e costa, caminda gran mayoria ta area turistico cu hotel. Cu biento di 165 km pa ora a pasa ranca y laga edificio na casi nada. Cayanan ta inunda, coriente a bay for di trempan den anochi y hopi riba caya pa cuminsa yuda den esfuerso di rescate.
Autoridad Mexicano ta den accion pa asina asisti e miles cu ta den desesperacion. Daño ta enorme pero ta buscando e miho manera pa cuminsa brinda ayudo na damnificado. Te na e momento aki ta papia di un cifra di 27 morto aunke ta mucho trempan pa confirma un cifra exacto.
