ota, cu durante madruga di dialuna a intensifica te converti den un horcan di categoria mayor, a alcansa awe mainta categoria 5, e maximo riba e escala Saffir Simpson, mientras cu e ta yega Centroamerica, unda cu ta premira pa toca tera awe nochi, Centro Nacional di Horcan (NHC) di Merca, a informa.
Den su boletin di 3’or di atardi, NHC a informa cu e horcan a presenta bientonan maximo sosteni di 260 kilometer pa ora (160 m/h) den su ruta pa e parti noordoost di Nicaragua y oost di Honduras, cu ta bao di aviso di horcan y unda ta spera cu e toca tera awe nochi.
“Por mira cu Iota ta sigui ta un horcan catastrofico di categoria cinco ora cu e acerca Centroamerica awe nochi,” NHC ta señala, y ta adverti pa awasero extremo, bientonan catastrofico y un subida peligroso di marea den e region aki cu e luna aki mes a ricibi e impacto di e fenomeno tropical Eta.
Iota, unabes cu e toca tera lo debilita te ora cu e caba diaranson, a desplasa na 15 kilometer pa ora (9 m/h) cu direccion west y ta ubica 65 kilometer (40m) west di e isla Caribeño di Providencia y 160 kilometer (100 m) oost-zuidoost di Puerto Cabezas, na Nicaragua.
E archipielago di San Andres y Providencia a sufri dialuna e sota di horcan Iota, cu a laga un lastro y hopi daño atras den e parti nort di Colombia continental, mientras cu Centroamerica tambe ta prepara, unda cu ta spera desde e atardi di dialuna pa cuminsa sinti bientonan fuerte y awasero, den e region Autonomo di Caribe Nort, na Nicaragua.
Bientonan cu forsa di horcan ta extende te cu 55 kilometer (35 miya) desde e centro di Iota, mientras cu e forsa di tormenta tropical ta extende te cu 240 kilometer (150 miya).
Meteorologonan ta premira cu den partinan di noordoost di Nicaragua y nort di Honduras Iota lo produci te cu 30 duim (750 mm) di acumulacion di awa, cu e consecuente peliger di inundacionnan fuerte repentino, desborde di riu y deslisamento di tera.
Den e costanan di Nicaragua y Honduras, NHC ta adverti riba e “peligroso” marea ciclonico cu ta hisa lama mas of menos 20 pia (6 meter) riba su nivel normal.
Dia 3 di november ultimo, horcan di categoria 4 Eta a mishi tera den e costa noordoost di Nicaragua, cu bientonan maximo sosteni di 140 miya pa ora (220 kilometer pa ora).
Segun calculonan di e pais Centroamericano aki, Eta a laga mas of menos 1890 cas destrui y otro 8030 cu dañonan parcial.
Te awor aki tabata tin 30 tormenta tropical cu nomber, di cual 13 tabata horcan y 6 di nan tabata mayor.
No falta mucho pa ta dia 30 di november, pa oficialmente e temporada di horcan den Atlantico caba.
