Dia 30 di april tabata un dia hopi special pa Mother’s in need Aruba Foundation (MINA). MINA ta un fundacion cu desde aña 2019 a cuminsa yuda e mama nan soltera den necesidad cu diferente producto. Hopi ta e mama nan cu a wordo afecta pa motibo di e pandemia global Covid-19 cu a surgi inespera y tabata un di e temporadanan mas dificil na nivel mundial.
MINA conhuntamente 2Fast4Usports a tene nan di 2 edicion di e Bushiri Karting Walk and Run and Kids Run riba 30 di april, unda un cantidad grandi di participante a acudi e diasabra mainta ey na Bushiri Karting pa asina participa. Sigur un mainta exitoso un bes mas y mas cu tur cos pa un super bon causa.
E mesun dia MINA den colaboracion cu Aruba Experience Cafe a tene nan prome Diaper Drive, cu e slogan di ‘Bring a Diaper for a Donuts’. Durante e drive nan a logra nan meta y a recauda suficiente pa asina duna e mama nan un regalo pa dia di mama. Esaki sigur no lo tabata posibel sin e colaboracion di e sponsornan y pueblo di Aruba.
Tambe MINA kier a gradici Women Empowering Women (WOW) pa por a duna 10 pakete di cuminda cu a wordo reparti conhuntamente cu e pakete nan di e diaper drive riba diasabra 7 di mei, net un dia prome cu Dia di Mama. Den colaboracion cu Fundacion Pa Nos Comunidad (FPNC) a logra haci mas di 25 mama contento cu necesidad nan basico pa e mama y baby.
