Recientemente a tuma luga un evento caminda cu a honra e legendario Edgar Connor, “Honor to Connor Steelband Celebration”, caminda cu e pueblo di San Nicolas y Aruba henter a reuni y duna honor na e musico aki. Paula Engelen, PR di Sweet Pan Production a comenta cu nan ta sumamente contento y gradici, con a haya sosten di e pueblo di San Nicolas y henter Aruba. E evento tabata exitoso y hopi bunita. A cuminsa for di 6’or di atardi y a caba pa 10’or di anochi.
E intencion di e celebracion aki tabata e cumpleaños di Edgar Connor. Si e tabata na bida, e lo a cumpli 80 aña.
Dia 18 di Januari, 1939 el a nace y a fayece na 1996. Edgar Connor, for di edad di 11 aña a cuminsa toca steelpan, a cuminsa tune steelpan y a trece e bida den e steelpan na Aruba. El a lanta Aruba Invaders Steel Orquestra den añanan 60, hunto cu su casa, sra. Gloria Thomas-Connor y asina a dirigi e orquesta, unda cu nan a presenta, gana contest, representa Aruba afo y asina engrandece e Carnaval di Aruba cu a cuminsa cu steelpan.
E logo ta un diseño di e poster cu nan ta usa como promocion. E ta un Steelpan di Edgar Connor, cual el a regala na Charles Brouns Sr., cu ta colga den Charlie’s Bar.
Nico Connor a duna e diseñador Mitch Almary, e formato final, e steelpan pa traha un diseño bunita pa e celebracion. Pa sorpresa ora cu a bay print e Tshirt, Marietje printing a interesa masha hopi den e diseño y kier a duna honor tambe na sr. Edgar Connor.
Awe por mira un T-shirt di 18 di Maart, cu ta luci cu e Steelpan di Edgar Connor y cu e bandera di Aruba patras, cual ta in loving memory di Edgar Connor. Ta super contento cu e idea di Marietje Printing, segun Engelen.
