Algo pasa di 12’or y 45 di diadomingo madruga, patruya di Noord cu para na e luznan di trafico na Palm Beach, a wak un accidente sosode nan dilanti. Mesora e patruya a bay pa tuma e accidente aki.
Tabata trata aki di un accidente entre un Hyundai Accent color shinishi numera A-40637 y un Kia Sportage color shinishi numera A-15633. Polis a tuma declaracion di esnan envolvi. Akinan e Accent tabata bayendo direccion ariba pasando den luz berde y e Kia Sportage cu a pasa den luz cora, no a paga tino di esaki cu consecuencia cu el a dal den e Accent. E pasahero den e Accent a resulta herida y a pidi presencia di ambulance pa asina duna e dama asistencia medico. Polis a pone e manehador di e Kia supla. Mirando cu el a surpasa e limite reglamentario, el a keda deteni mesora. A manda pidi dogcatcher pa asina transporta e homber aki pa warda. Daño material ta considerabel.
